Kralendijk - Awe un biaha mas mi tin bon notisia. E kantidat di kaso di COVID-19 ta abou i ta keda stabil. Nos tin 18 kaso aktivo. Te ku awor tin 10.824 di e kantidat di kasi 19.000 hende ku ta ful bakuná. I tin 13.855 hende ku a pasa di promé angua. Esei ta 57,1 % porshento di hende ku ta ful bakuná i 73,1 porshento di hende ku a pasa un angua.
Mi ta kontentu di mira ku mas i mas hende ta bai bakuná.
Tur esakinan ta pone ku den futuro nos por sigui suavisá e medidanan. Entrante awe nivel di riesgo dos 2 esta preokupante ta konta pa un periodo di 4 siman, ke men di awe djaweps 27 di mei te ku djaweps 24 di yüni benidero.
Esaki ta e kambionan mas importante : Entrante awe por tene enkuentro privá manera na kas, playa i parke ku 25 persona. Restorant, sentro deportivo, misa, sauna, kasino i sine por usa nan kapasidat normal. Pero teniendo kuenta ku distansia sosial di 1,5 mei entre persona I kas di famia.
E konseho pa traha mas tantu posibel na kas no ta na vigor mas.
Ta keda importante pa evitá grupo grandi di hende, i evitá tambe pa hende bòncha riba otro den un espasio kaminda no tin aire fresku.
No lubidá ku ketu bai e vírùs ta riba nos isla. Nos no mester duna e vírùs chèns pa plama! Si bo tin keho di salú : keda kas i laga nan tèst bo.
Den nivel di riesgo dos tin eksepshon riba e medidanan ku ta konta. Por ehèmpel for di awe por praktiká deporte atrobe den presensia di públiko. Na e lugá di deporte ta permití 50 % di e kapasidat di hende pa ta presente. Asina nos ta sòru ku no tin grupo grandi di hende ta bini huntu. No ta permití konsumo di alkohòl pa públiko.
Entrante awe ta posibel pa kanta i baila pero solamente pafó, den aire liber. Por lesa tur e medidanan riba website www.bonairecrisis.com
Mas aleu mi ke anunsiá ku tin kambio tambe den e kondishonnan pa biaha pa Boneiru. (2 sek pousa!)
Pronto nos por ofresé pasaheronan e tèst antígeno na yegada na aeropuerto di Boneiru. Esaki ta nifiká ku pronto nos por tin mas buelo for di destinashon internashonal atrobe. Por ehèmpel otro siman porfin e promé buelonan ta yega for di Merka.
Entrante promé di yüni no tin obligashon di karentena sentral mas. Ta posibel pa bai den karentena na kas si situashon na kas ta permití. Riba e di sinku dia por hasi un tèst pa sali for di karentena. Por hasi e tèst akí na departamento di Salubridat Públiko. E obligashon di karentena ta keda na vigor pa pasahero for di pais ku riesgo hopi haltu.
Djamars último na Hulanda Eerste Kamer a aprobá un lei ku ta hasi posibel pa distinguí den maneho pa hende ku ta ful bakuná i hende ku no ta ful bakuná. Esaki ta pone ku nos por hasi e distinshon akí tambe ora hende ta biaha bini Boneiru. Nos ta hasi un distinshon ora hende ta biaha di Aruba i Kòrsou pa Boneiru. Entrante promé di yüni un hende ku ta biaha di Aruba i Kòrsou pa Boneiru no tin mester di hasi tèst si e ta ful bakuná. Un hende ta ful bakuná si el a pasa e di promé i e di dos angua, i si el a pasa e di dos angua mas ku dos siman pasá. Aruba i Kòrsou ta evaluando si nan por introdusí e regla akí tambe pa hende di Boneiru ku biaha pa e islanan akí.
Manera mi a menshoná tin basta desaroyo positivo na Boneiru. Esaki ta posibel pasobra kada un di boso a kumpli i kontribuí ku e medidanan. Mi ta spera ku nos ta keda riba e kaminda akí i ta sigui kumpli. Mi ta terminá hasiendo un apelashon na un i tur pa mantené nan mes na e reglanan i medidanan. Si bo tin síntoma bai tèst. I bai bakuná.
