Kralendijk - Mi kier kuminsá awe riba Dia internashonal di Enfermeria, na yama un pabien i danki na tur ku ta traha den enfermeria. A keda demonstrá kon balioso bosnan aporte ta pa komunidat. E trabou ku boso ta hasiendo, sigur den e aña ku ta tras di lomba, a mustra di ta unu hopi importante pa nos komunidat.
Awor ku e kantidat di persona infektá ku Covid-19 a baha na 10 persona i no tin hende ku Covid interná na nos hospital, por sigui suavisá nos medidanan. Ya pa tres siman kaba nos ta den e nivel di riesgo 4. Poko poko a mira e sifranan baha i stabilisá. P’esei mi a tuma e desishon pa aworakí bai den nivel di riesgo 3. E fase akí ta konta pa dos siman. Despues di dos siman ta bolbe evaluá kiko ta hasi. Nos mester keda kouteloso pasó delaster dianan akí ta mira ku tòg ainda tin persona ta tèst positivo pa Covid-19.
Nivel di riesgo 3 kier men ku entre otro ta permití pa bar, restorant i kasino por keda habrí mas lat. Pa un splikashon amplio bishitá nos wèpsait bonairecrisis.com. Na e sekshon di medidanan ta haña tur informashon di e nivel di riesgo. Ku ta bai nivel di riesgo 3 no kier men ku tin ku hasi manera e periodo di Covid a pasa. Ta konstatá ku ainda hopi hende ta bini huntu den grupo grandi. Manera entre otro pa Dia di Mama òf na fiestanan ilegal na kas òf bich. Formando asin’aki peliger ku e vírùs ta sigui plama. P’esei mi ta hasi un yamada serio na un i tur pa evitá bini huntu den grupo grandi.
Di otro banda mi ta kontentu di mira ku mientrastantu mas i mas persona a bai bakuná. Tin 68% ku a pasa sigur e promé angua. Ta importante pa tuma e di dos bakuna tambe pasobra ta e bakuna ta nos salbashon aworakí for di e krísis di corona. Aweró dòkter Marian Luinstra-Passchier lo duna mas informashon tokante esaki.
Desde 19 di mei awor e konseho di biahe hel lo konta pa Boneiru. Hulanda ta konsiderá Boneiru komo un isla di riesgo abou. Pasaheronan for di Boneiru biahando pa Hulanda no mester hasi un tèst mas i no ta duna e konseho pa nan bai den karentena. Di otro banda, Hulanda sí ta keda un pais di riesgo haltu pa Boneiru. Pa esei ta mantené e tèstnan ku tin ku hasi ora ta bini Boneiru.
Den parlamento hulandes, Tweede Kamer, a pasa dos lei ku ta relevante pa Boneiru. Ku e leinan akí tambe por bini ku regla diferente pa hende bakuná i hende no bakuná ku ke bini Boneiru. Despues lo duna mas informashon pa kua pais e reglanan nobo ta bai konta. Loke sí mi por bisa for di awor ta ku pronto nos ta introdusí e medida ku por biaha for di nos hermana islanan sin pasa tèst si un hende ta ful bakuná.
E lei ta hasi tambe entre otro posibel ku na yegada pasaheronan por hasi e tèst antígeno. Asin’aki pa kompanianan di aviashon merikano ta bira mas fásil pa transportá pasahero pa Boneiru. Nos speransa ta ku pronto nan lo kuminsá bula pa nos isla.
Kòrda kuida i keda mantené bo mes na e reglanan di higiena si bo tin síntoma hasi e tèst i bakuná.
