Bon dia tur hende. Komo dòkter mi ke splika entre otro kiko nivel di riesgo 1 ta enserá. COVID-19 ta na Boneiru ainda i lo keda na nos isla den e tempu benidero. Nos tur lo mester siña biba ku COVID-19. Ta sigur ku ratu ratu nos lo tin un brote chikitu. Nos lo por kontrolá e situashon akí huntu si mas tantu hende bai bakuná. I tambe si nos sòru pa nos no bòncha riba otro den espasio será. Den nivel di riesgo unu ainda hende mester sigui mantené distansia.Ta keda importante tambe pa bo sigui laba man regularmente i pa tosa òf nister den bo èlebog. Si bo tin keho keda kas, maske bo kehonan ta leve. Yama 0800 0800 i traha un sita pa nan tèst bo.
Te ainda ta posibel pa pasa e promé òf e di dos angua kontra corona. Si bo ke, bo por yama 0800 0900 pa traha un sita pa pasa angua. Pero bo por pasa angua tambe sin traha sita sea na un dòkter di kas òf na Kompleho Deportivo Jorge Nicolaas. Riba facebook i den korant ta publiká e dianan ku por pasa angua sin traha sita.
Studiante di Boneiru ku ta den eksterior i ta bin pasa vakashon na nos isla por meldu nan pa nan bakuná durante nan estadia. Ta importante pa hende yòn bai bakuná pa yuda limitá plamamentu di e vírùs.
Awor ku no lo tin karentena obligatorio mas, Salubridat Públiko ta monitoriá ku mas atenshon ainda kua ta e variantenan di e vírùs ku ta plama na e isla. Asina nos por monitoriá bon si biaheronan ta drenta Boneiru ku e vírùs. Ta manda tur vírùs ku nos topa ora di tèst pa Instituto di Reino pa Salubridat Públiko i Medio ambiente, RIVM na Hulanda pa analisá mas leu. Nos ta hasi tur loke nos por pa tene Boneiru seif pa su habitantenan i bishitantennan.
