Despues di un wikènt di búskeda intensivo a lokalisá e rèptil, probablemente un krokodel ku e nòmber sientífiko ‘Crocodylus acutus’, den e área rònt di Lac Bay. Un tim spesialisá di STINAPA ta na e sitio pa monitoreá e situashon i pa kapturá e krokodel na un manera seif.
E tipo di krokodel akí ta un espesie skiu i tímido ku ta biba den áreanan ku awa brak òf awa salu, manera tanki (vijver), riu i palu di mangel. E palunan di mangel di Lac ta un lugá di biba adekuá pa e animalnan akí. Krokodel ta regulá temperatura di nan kurpa pa medio di drumi den solo òf pa medio di muda pa sitionan mas friu. Ora un krokodel bula ònverwagt den awa, esaki no ta un señal di agreshon, pero di spantu. Tambe ora nan ta drumi den solo i habri boka manera nan ta hap, esaki ta normal i ta sirbi pa regulá nan temperatura. Nan kuminda ta konsistí di mamífero chikitu, para, sapu, turtuga i piská.
Sorobon i Lac Cai ta habrí atrobe:
A base di konseho di ekspertonan internashonal, entre otro IUCN i koleganan di Diergaarde Blijdorp Rotterdam, a disidí pa habri Sorobon i Lac Cai atrobe pa públiko. Aunke e àreanan i establesimentunan di hóreka ta aksesibel atrobe, ta deskonsehá pa drenta den laman i si hasi esaki, e ta kompletamente pa propio riesgo.
Medidanan di siguridat:
Entidat Públiko Boneiru i STINAPA ta atvertí públiko ku drentamentu den laman i rekreashon den e áreanan di Sorobon i Lac Cai (Lac Bay) ta tuma lugá kompletamente pa propio riesgo. Konsultá e bòrchinan di STINAPA: den e áreanan ku ta indiká ku kòrá, ta estriktamente prohibí pa drenta den laman.
Ta supliká bishitantenan urgentemente pa no bai kaminda tin yerba di laman i pa keda den awa plat. E medidanan akí ta di importansia grandi pa siguridat di públiko i pa duna e área e trankilidat nesesario. Esaki ta esensial pa e operashon di búskeda i e evaluashon di riesgo.
Konseho adishonal pa piskadónan:
Ta supliká piskadónan profeshonal i hendenan ku ta piska pa hòbi, pa no limpia e piskánan ku nan a kue na kantu di laman, pero pa bai ku nan na un otro sitio pa di e manera ei evitá atenshon indeseá di e rèptil.
Mantenshon di lei:
STINAPA lo aktua severamente den kaso di violashon di e reglanan di siguridat imponé. Ta saka personanan ku no ta kumpli ku e reglanan for di laman.
Pa mas informashon i aktualisashon, konsultá ku e kanalnan ofisial di STINAPA i entidat públiko Boneiru.
