EU Desk Curacao den koperashon ku International Desk di Boneiru i partnernan for di Aruba i Hulanda ta organisá e online EU Funds Week (siman di finansiamentu di Union Oropeo) den e siman di 7 te ku 11 di novèmber. E siman ta den signo di e posibilidatnan pa finansiamentu di Union Oropeo pa organisashonnan lokal. E evento virtual ta grátis i aksesibel pa tur hende, pero registrashon ta obligatorio. Por registrá via eudeskcuracao@gobiernu.cw.
Tur aña Union Oropeo ta pone un suma supstansial riba su presupuesto pa yuda organisashonnan den su paisnan miembro i nan teritorionan ultramar realisá e agènda oropeo. E seis islanan ultramar di Reino tambe ta bini na remarke pa mayoria di e supsidionan akí. Meta di e siman di informashon akí ta pa engrandesé konsiensia den e parti karibense di Reino pa loke ta trata e posibilidatnan di finansiamentu akí i pa yuda organisashonnan lokal ku nan petishonnan pa supsidio.
E programa ta enserá vários presentashon i tayer tokante diferente programa di finansiamentu i instrukshon pa skirbimentu i maneho di petishon pa supsidio. E oradornan lo elaborá tokante algun tep i triki pa surpasá e opstákulonan ku tin den e proseso di hasi petishon pa supsidio i nan lo mustra algun ehèmpel di kasonan eksitoso.
Un di e entidatnan ku ta partisipá ta Agensia Erasmus plùs. Erasmus plùs ta e programa di finansiamentu di Union Oropeo ku ta mas konosí na nos islanan i e ta spesialisá den supsidio pa sektor di enseñansa. Agensia Erasmus plùs NL ta disponé di un tim i un sistema di sosten bon ekipá pa yuda organisashonnan ku nan petishonnan pa supsidio. Durante nan presentashonnan nan ta dediká atenshon na e aspektonan mobilidat i laso di kolaborashon. Meskos ta konta pa representantenan di e ofisina di Kultura Hulandes ku resientemente a bishitá nos islanan i ku tin un bon komprendementu di e nesesidatnan i eksigensianan lokal.
E aña akí lo dediká un seshon tambe na posibilidat di finansiamentu pa hóbennan. Diferente hóben ku a partisipá na un programa di interkambio di hóben na Brussel lo kompartí nan eksperensianan.
Riba djárason 9 di novèmber pa kuat’or di atardi STINAPA ta presentá e desaroyo di Lac Bay komo un ehèmpel di un proyekto ku Union Oropeo a finansiá eksitosamente. Otro tópikonan ta entre otro e konekshon entre e Metanan Sostenibel di Desaroyo (Sustainable Development Goals – SDG’s) i e petishonnan pa supsidio.
Pa mas informashon i pa registrashon tuma kontakto ku EU Desk Curacao (telefòn: +599 9 462 1444, email: eudeskcuracao@gobiernu.cw)
