For di 8 te ku 16 di novèmber Biblioteka Públiko Boneiru tin e selebrashon anual di Siman di Buki pa Mucha, ku e aña akí tin komo título ‘’Bòshi Aventura - Vol Avontuur.’’
Durante di e siman festivo akí tur kos ta drai rònt di imaginashon, deskubrimentu i plaser den lesamentu. Nos ta invitá nos muchanan pa huntu ku e eskrítornan i artistanan ku ta bishitando tur nos skolnan durante e siman akí, hasi un biahe den e mundu di buki: Un mundu yen di koló, kultura i kreatividat. Banda di esaki biblioteka ta organisá diferente aktividat edukativo pa nos muchanan i nan mayornan.
E ‘’Buki di regalo pa Siman di Buki pa Mucha’’ un biaha mas tabata na enkargo di Sharlon Willems
E aña akí tambe e eskritor Sharlon Willems a pèrkurá pa nos ‘’Buki di regalo pa Siman di Buki pa Mucha’’, ku ilustrashon di Gerulaine Booi. Su buki ta un refleho di amistat, kuriosidat i kurashi ku ta sobresalí for di loke ta komun. Eksaktamente loke e tema ‘’Bòshi Aventura’’ ta para p’é.
Biblioteka Bibu na Rincon
Un di e inovashonnan pa e aña akí ta e Biblioteka Bibu ku ta bai tuma lugá na Rincon. Biblioteka Públiko Boneiru ta organisá e evento pekuliar akí den kolaborashon ku e multitalentoso Rogen Pineda ku literalmente lo duna bida na vários storia. For di storianan popular tradishonal te na narativonan moderno. Bou di guia di Rogen, Rincon pa un solo dia lo ta e kurason ku ta bati den ‘’Siman di Buki pa Mucha’’.
Kansion di ‘’Siman di Buki pa Mucha’’ kantá pa Luis Moka
Músika tambe tin un partisipashon prominente e aña akí. E kompositor di kantika i alabes kantante Luis Moka a skirbi i kanta e kantika ofisial di ‘’Siman di Buki pa Mucha’, ku ta titulá’ ‘’Bòshi Aventura’’. Ku su ritmo enérgiko, su refran impaktante i un mensahe positivo, Moka ta invitá tur mucha pa kanta, baila, lesa i ban un Aventura huntu.
Su músika ta duna bida na e tema di e siman akí. Esaki ta unu plasentero, e ta inkluí un i tur i tambe e ta yen di optimismo. Nos ta invitá tur nos muchanan pa dia 8 di novèmber bin ku nan ‘’Bèrdèki’’ pa bin festehá i kanta huntu ku Luis Moka.
Lesamentu ta uni i konektá, asina huntu nos ta krese meimei di e storianan
E siman di buki pa mucha ta pa pone énfasis riba importansia di lesamentu pa desaroyo di nos muchanan. Buki ta stimulashon di idioma, buki ta enrikesé nos mundu i buki ta kontribuí na empatia i konekshon kultural. Loke Biblioteka Públiko Boneiru ke logra e siman akí, ta pa kada mucha eksperensíá ku lesamentu no solamente ta edukativo, pero tambe plasentero, aventurero i ta desaroyá konfiansa propio.
Tur hende ta bon biní
Kariñosamente nos ta invitá tur mucha entre 4 pa 12 aña pa forma parti di e aktividatnan den ‘Siman di Buki pa Mucha’’.
Entrada ta kompletamente grátis pa nos skolnan, nos famianan i tur nos hóbennan aventurero aki na Boneiru.
Pa e programa kompletu i mas informashon :
- Bishitá biblioteka òf wak riba www.bibliotheekbonaire.com i riba nos página di Facebook.
- Tuma kontákto ku jakeemahernandez@bonairegov.com
