Siman Di Ban Lesa Ku Mi na Boneiru: Un siman yen di aktividat plasentero i edukativo

For di 25 di yanüari te ku 1 di febrüari nos ta selebrá e Siman Di Ban Lesa Ku Mi na Boneiru. E siman akí ku a keda organisá den kolaborashon ku Biblioteka Públiko Boneiru, Biblionef i ‘Nederlands Letterenfonds’ ta dediká kompletamente na e importansia ku lesamentu pa mucha tende tin pa desaroyo di mucha yòn. Lesa pa mucha tende ta stimulá imaginashon i ta yuda nos muchanan deskubrí palabra i storia nobo. Durante e siman spesial akí tin tur sorto di aktividat pa mucha di 0 te 6 aña.

Riba djasabra 25 di yanüari e kampaña ta habri den un forma festivo ku un Desayuno di Lesa i un presentashon di e buki Kumbai Baby di parti di Mylo Freeman. Durante e siman vários persona konosí ku ta lesa pa mucha tende ta bishitá diferente akohida pa mucha, entre otro e eskritor Mylo Freeman (Hulanda), e aktris Milushka Birge (Kòrsou), e kontadó di storia Jeaniro Dorothea (Boneiru) i e dosente Thasjanara Rosario (Boneiru). E momentunan di lesa pa mucha tende akí ta spesialmente pa mucha di 3 te 4 aña i nan ta tuma lugá na diferente akohida pa mucha na Boneiru. Banda di esaki Mylo Freeman den kolaborashon ku Biblioteka ta organisá un seri di tayer, entre otro un tayer di Barbie, un tayer di Prinsesa Arabella i algun tayer di ilustrashon i skirbimentu. Tur aktividat ta aksesibel grátis, pero registrashon ta nesesario pa motibu di e kantidat limitá di lugá. Por hasi esaki via e QR-code ku lo ta disponibel na Biblioteka i riba nos página di Facebook.

Tokante e Siman Di Ban Lesa Ku Mi

E Siman Di Ban Lesa Ku Mi ta un evento ku ta bini bèk tur aña na Hulanda i den Karibe, i su intenshon ta pa pone énfasis riba importansia di lesa pa mucha yòn tende i pa stimulá nan amor pa lesamentu. Na Boneiru nan ta brasa e inisiativa akí ku hopi entusiasmo, ku un siman yen di aktividat di lesamentu pa mucha tende i tayer.