For di prinsipio di e aña aki, a detektá seis kaso konfirmá di dengue na Boneiru, asina e departamento di Salubridat Públiko ta laga sa. Awor no tin un brote ainda, pero sí ta importante pa siudadanonan tuma medida pa prevení ku dengue ta plama. Hende ta infektá ku piká di e sangura di dengue. Departamento di Salubridat Públiko ta hasi un yamada pa no duna e sangura di dengue chèns pa pone webu den awa ku ta keda para. P’esei e konseho ta por ehèmpel pa tira awa afó ku ta keda para den ophetonan den i rònt di kas.
Departamento di Salubridat Públiko ta hasi un yamada na siudadano tambe pa pèrkurá ku e sangura di dengue no ta pika nan. Por hasi esei por ehèmpel usando un sprei kontra sangura ku ta kontené DEET. Na algun isla den Karibe tin na e momentu akí brote di dengue. Departamento di Salubridat Públiko ta urgi tur siudadano pa evitá un brote na Boneiru.
Asina bo ta prevení un piká di e sangura di dengue:
- Hunta bo kurpa ku un krema ku DEET aden
- Usa un sprei ku DEET aden i spùit esaki riba bo kurpa
- Bisti paña ku un koló kla ku ta kubri bo kurpa bon
- Usa skrin na kas
- Tene bentana i porta bon será
- Semper drumi bou di un mosketero
- Usa flit kontra sangura pa tene kas liber di sangura.
Asina bo ta prevení subida di e kantidat di sangura di dengue.
Eliminá tur opheto rònt di kas ku awa aden manera:
- baki di plèstik
- tayer
- bòter
- bleki
- tapa baki/barí ku awa di yobe ku un paña,
- pone un elastik òf kabuya rònt di e paña
Dòkternan di kas i laboratorio ta informá departamento di Salubridat Públiko di kasonan di dengue. Despues di un notifikashon, departamento di Salubridat di Públiko ta tuma kontakto ku e persona infektá. E persona akí ta haña tep i konseho di e departamento. Despues un inspektor di e departamento ta bishitá e persona na kas. Tarea di inspektor entre otro ta pa eliminá kriadero di e sangura di dengue. P’esei nan ta kontrolá ku si den besindario di e kas di e persona enfermo tin kriadero di e sangura di dengue. Si ta asina, e ora ei ta trata e kriaderonan.
Bo tin mester di konseho òf yudansa pa awa di yobe den barí òf renbak? Òf bo tin hopi molèster di hopi sangura? Yama e ora ei Departamento di Salubridat Públiko na e number 715-5324. Pa mas informashon tokante dengue bishitá bonairegov.com/muggen.
