Na Boneiru tin diferente fuente di kontaminashon di medio ambiente konosí, manera prosesamentu inkorekto di shushi, kandela na lèntfel i shushi riba kaya i den mondi. Entidat Públiko Boneiru ke haña mas bista tambe di e diferente fuentenan di kontaminashon di medio ambiente, influensia di esakinan riba ambiente di biba i riba salú di nos habitantenan.
Investigashon di parti di RIVM
Den e periodo di 2025-2026 RIVM a ehekutá un investigashon eksploratorio di kontaminashon di medio ambiente i salú na Boneiru. E investigashon a konsistí di:
- Investigashon di fuentenan eksistente i posibel fuentenan di kontaminashon di medio ambiente na Boneiru;
- Un bishita di trabou, kaminda RIVM a bai den kòmbersashon ku aktornan relevante i por a tira un bista riba e situashon lokal;
- Un investigashon di persepshon, kaminda habitantenan di Boneiru pa medio di un lista di pregunta por a kompartí e eksperensianan i preokupashonnan ku nan tin relashoná ku kontaminashon di medio ambiente i eventual kehonan di salú.
A kompilá e resultadonan den un rapòrt ku konseho pa Entidat Públiko Boneiru pa pasonan di kontinuashon. For di djárason 22 di aprel e rapòrt ta disponibel riba https://www.rivm.nl/publicaties/milieuvervuiling-en-gezondheid-op-bonaire.
E temanan di medio ambiente i e konsehonan korespondiente di mas importante segun e rapòrt di RIVM
For di e investigashon diferente tema di medio ambiente a bini dilanti ku ta pidi mas atenshon. Ta trata di entre otro: e problemátika relashoná ku e sentro di shushi na Lagun, kalidat di awa, suela i aire, shushi riba kaya i den mondi i dùmpmentu ilegal di shushi, molèster di stòf i zonido, i salú den relashon ku kontaminashon di medio ambiente. E preokupashonnan di mas grandi ta tokante e seru di shushi ku kada biaha ta bira mas grandi i e kandelanan na e lugá di depositá shushi akí na Lagun.
Ta nesesario pa tuma medida na e lugá di depositá shushi na Lagun
Hendenan ku ta biba pegá ku e lugá di depositá shushi pa hopi tempu kaba ta eksperensiá diferente keho di salú. Ora tin kandela na e lugá di depositá shushi, nan ta sinti benout i nan tin molèster di tosamentu i doló di wowo.
Segun RIVM ta importante pa riba término kòrtiku tuma medida pa mehorá e situashon. Otro organisashonnan tambe, manera ILT, ya kaba a duna konseho tokante esaki anteriormente. Posibel medidanan ta: tapa e shushi bon na e lugá di depositá shushi, mehorá e prosesamentu di shushi, paga e kandelanan i evitá ku ta surgi mas kandela.
RIVM ta konsehá tambe pa rònt di e lugá pa depositá shushi i rònt di e kasnan den bisindario di esaki, midi kua ta e supstansianan ku ta bini liber i ku por ta dañino pa salú. Investigashon di kehonan di salú, preokupashonnan i bienestar mental di e hendenan ku ta biba den bisindario, por yuda gobièrnu di Boneiru mehorá salú. RIVM ta enfatisá ku e investigashon akí no tin mag di okashoná retraso den tumamentu di medida pa mehorá e situashon na e lugá pa depositá shushi.
Haña mas konosementu tokante kontaminashon di medio ambiente i tokante salú na henter nos isla
Den su rapòrt RIVM ta konsehá pa haña mas konosementu pa loke ta trata kontaminashon di medio ambiente i e efektonan ku esaki tin riba salú pa henter nos isla. Awor akí tin tiki konosementu di esaki ainda. Akí tambe ta konta ku ta importante pa kuminsá tuma medida si esaki ta posibel, i kaminda ta nesesario hasi investigashon adishonal. Kua medida òf investigashon esakinan ta, ta diferensiá pa kada tópiko. RIVM ta konsehá pa hasi uso tambe di resultado di investigashonnan di salú di poblashon na nos isla, manera ‘Gezondheidsmonitor (publikashon di Omnibus na aña 2026)’ i un investigashon ku ta na kaminda tokante influensia di malesa di infekshon i sirkunstansianan di biba (PIENTER na aña 2027).
Konklushon i pasonan di kontinuashon
Kolegio Ehekutivo ta tuma e konsehonan di RIVM na serio i den e periodo binidero ta bai deliberá tokante nifikashon di e rapòrt pa maneho i ehekushon. Den esaki ta formulá un elaborashon di e pasonan di kontinuashon i midimentu konkreto i nesesario, ku komo meta pa redusí impakto di e situashon riba hende, bestia i naturalesa.
E problemátika relashoná ku salú i kontaminashon di medio ambiente na Boneiru ta kompleho i ta rekerí kolaborashon entre gobièrnu lokal, gobièrnu di Hulanda, stakeholdernan i komunidat. Entidat Públiko Boneiru ta atendé ku e proseso akí na un manera interdisiplinario pa yega na un aserkamentu integral. Tokante e trayekto di kontinuashon lo komuniká den un forma transparente, di manera ku komunidat ta keda bon informá tokante aserkamentu, progreso i realisashon di e medidanan ku mester tuma.
