E tim di futbòl Special Olympics di Boneiru a partisipá den e Special Olympics Kingdom Games riba djasabra 4 di novémber i djadumingu 5 di novèmber. Riba djasabra, e atletanan a risibí un klinika di futbòl i tabata tin un kompetensha di pinalti. Danki na e esfuerso di e entrenadónan i e patrosinadó di kèts pa hunga futbòl di PUMA, partner di PSV Eindhoven en kolaborashon ku OLB i FFB, Boneiru por a mustra nan forsa berdadero den e kompetensia di pinalti. Ku tironan fuerte i kalkulá, nan a lucha kontra Aruba, Kòrsou i Boneiru. E porteronan tabata tin nan problema ku nan, pero na final Boneiru a keda ku Dennis Reina na di tres lugá i Ruperto Beukenboom na di promé lugá.
Djadumingo e kompetensianan a kumisá despues di un dia ameno ku aktividatnan di futbòl. Na un momentu tabata parse ku yobida lo a bai stroba e weganan dor di buta tur kos bou di awa, pero no pa e atletanan. Nan a lucha duru bou di e yobida pa representá nan pais. Den e promé wega Boneiru kontra Kòrsou, Boneiru a kuminsá riba un bon kaminda, i despues di dos gol bunita, Kòrsou tabata parsé di regresá bèk den wega. Ku un final fuerte, Boneiru a gana finalmente ku 8-2. Durante e di dos wega, Aruba a mustra kiko un programa di futbòl pa Special Olympics ku durashon i struktura por nifiká. Finalmente, Aruba a gana ku 0-8 konvinsentemente kontra Kòrsou. Tambe den e último wega, Aruba a mustra nan kalidat kontra Boneiru, pero Boneiru no a entregá. Ku hopi esfuerso i lucha, Boneiru a logra skor 3 biaha i e skor a yuda pa drecha e posishon. Lamentablemente, Aruba a bai dilanti den e fase final ku algun atake bunita, ku a hasi ku e skor final a bira 9-3. Na final Kòrsou a keda na di tres lugá, Boneiru na di dos i Aruba na di promé lugá. Tur ta haña felisitashon ku boso prestashon!
Resultado di e weganan
Boneiru 8 - 2 Kòrsou
Kòrsou 0 - 8 Aruba
Aruba 9 - 3 Boneiru
E organisashon ta yama danki na tur voluntario i instanshanan envolví pa nan yudansa i esfuerso. Tambe nos ta deseá di yama danki na tur atleta i entrenadó pa nan esfuerso, alegria i ta felisitá nan ku nan prestashon. Nos ta mira bek riba un fin di siman eksitoso ku perspektivanan bunita pa futuro!
