Rektifikashon deklarashon riba tumamentu di desishon den kolegio ehekutivo

Komo reakshon riba informashon resien den korant Boneriano i deklarashonnan den e programa di radio 'Tra’i Merdia', diputado Weber ta deseá di aklara echonan rondó di e proseso di tumamentu di desishon den Kolegio Ehekutivo (BC).

Den medionan di komunikashon a krea e imágen ku e diputado ku kartera di Finansas lo a ser obstakulisa òf ku e lo a keda “votá afó” pa un mayoria den Kolegio Ehekutivo relashoná ku palabrashon ku Kolegio di Supervishon Finansiero (Cft). E representashon di e asuntu akí ta formalmente inkorekto.

Diputado Weber ta konfirma e sigiente puntonan:

• Tur desishon relashoná ku maneho finansiero di Entidat Públiko Boneiru desde ougùstùs 2025 te awe a keda tumá unanimamente pa Kolegio Ehekutivo.
• Nunka tabatin kuestion di un votashon kaminda demas miembronan di e kolegio ehekutivo a rechasá un proposishon di diputado di Finansas.
• E koperashon den e Kolegio Ehekutivo ta tuma lugá a base di kolegialidat i konforme e struktura legal di e Wet openbare lichamen Bonaire, Sint Eustatius en Saba (WolBES) i e Wet financiën openbare lichamen Bonaire, Sint Eustatius en Saba (Wet FinBES).

Diputado Weber ta lamentá ku pa medio di interpretashonnan robes den media, a lanta duda tokante e union di maneho i integridat di Gezaghèber i e sobrá miembronan di Kolegio Ehekutivo. Ku e deklarashon akí, ta rektifiká formalmente informashon eroneo tokante e supuesto desunion di maneho den gobièrnu.