For di awor, habitantenan di mesun kas i kontaktonan estrecho di un persona kontagiá no mester bai den karentena si nan a pasa e angua di buster mas ku shete dia pasá. Kontaktonan estrecho òf habitantenan di mesun kas ku un persona kontagiá ku no a pasa un angua di buster ainda sí mester bai den karentena. Un kontakto estrecho òf habitante di mesun kas ku un persona kontagiá ku segun e regla nobo no mester bai den karentena i tòg ta haña keho di corona, mester yama 0800 0800 mesora pa un sita pa tèst. A adaptá e reglanan di karentena pa habitantenan di mesun kas i kontaktonan estrecho awor ku e departamento di Salubridat Públiko sa mas di e variante ómikròn di e vírùs di corona.
For di investigashon ta resultá ku hendenan ku a pasa e angua di buster ta bon protehá kontra e variante ómikròn i tambe kontra hospitalisashon. Ta konosí ku e variante akí ta plama fásilmente i ku hendenan kontagiá generalmente ta bira ménos malu. Na e momento akí tin hopi kontagio ku e variante ómikròn, hopi trahadó ta den karentena. Pa e motibu akí dunadónan di trabou ta konfrontá ku poko personal na trabou.
Promé ku adaptashon di e reglanan di karentena, kontaktonan estrecho i habitantenan di mesun kas ku personanan kontagiá bou di sierto kondishon ya kaba no mester a bai den karentena. Esei tabata por si nan a tèst positivo ménos ku ocho siman pasá, a rekuperá i no tabatin keho mas. E regla aki ta na vigor ainda.
Pa mas informashon tokante e reglanan nobo di karentena, bishitá www.bonairecrisis.com òf yama 0800 0800.
