Entidat Públiko Boneiru, e direktivanan di skol i e unidat di Ministerio di Enseñansa, Kultura i Siensia den Área Karibense (OCW CG) di Servisio di Reino Hulanda Karibense (RCN) ta informá mayornan i kuidadónan tokante e prosedura rònt di ponementu di mucha di kuater aña den grupo 1 di enseñansa básiko.
Mayornan por registrá nan yu, ku ta bai skol básiko pa promé biaha, for di 1 di yanüari te ku 31 di mart 2026 via e sistema di registrashon sentral digital www.aanmeldenbasisonderwijsbonaire.com. Na nòmber di e direktivanan di skol, Skol Básiko De Pelikaan ta fungi komo e instansia ku ta responsabel pa e registrashon. For di aña 2018 e kuater direktivanan di skol ta usa e sistema akí, ku Entidat Públiko Boneiru i Reino ta finansiá.
E pasonan den e prosedura di ponementu di yu na skol:
- Registrashon: Mayornan/kuidadónan ta registrá nan yu digitalmente i ta indiká tres skol di nan preferensia.
- Kontròl: E kordinadó di www.aanmeldenbasisonderwijsbonaire.com ta kontrolá si e registrashon ta kompleto.
- Evaluashon: E skol di e promé preferensia ta evaluá e petishon a base di su propio kriterionan di atmishon (por ehèmpel si tin un ruman na e skol ei kaba, òf si un mayor ta traha einan.)
- Atmishon: Si tin un lugá disponibel, ta pone e yu na e skol. E mayornan/kuidadónan ta haña un konfirmashon.
- Rechaso: Si no logra pa pone e yu na un skol di preferensia, e ora ei e mayonan ta risibí un mensahe di rechaso di e skol en kestion i ta manda registrashon di e yu pa e siguiente skol di preferensia.
- No tin lugá? Si na tur e tres skolnan di preferensia no tin lugá, e ora ei e responsabilidat ta serka e mayornan/kuidadónan pa tuma kontakto ku otro skolnan kaminda posibelmente sí tin espasio ainda.
Puntonan problemátiko aktual i direkshonnan di solushon
Pa e aña eskolar binidero tur grupo 1 na Playa ta yen. Na Rincon tin lugá disponibel ainda. Mayornan/kuidadónan ku ke hasi uso di transporte eskolar pa bai Rincon, por registrá na direktorado di Komunidat i Kuido di Entidat Públiko Boneiru.
Tur lugá ta okupá na tur e skolnan? E ora ei tuma kontakto ku e empleado públiko di enseñansa obligatorio via (+599) 777 2296. Ta importante pa den un kaso asina mayornan/kuidadónan registrá nan yu komo mucha ku ta buska skol serka e empleado públiko di enseñansa obligatorio. Esaki ta duna mas splikashon tokante e pasonan di kontinuashon.
Yamada na tur mayor/kuidadó
Nos ta hasi un yamada na mayornan/kuidadónan pa registrá nan yu na tempu den e periodo di 1 di yanüari te ku 31 di mart. Tur mucha for di kuater aña ta kai bou di lei di enseñansa obligatorio. Si bo skolnan di preferensia ta yen, esaki no ta un motibu pa tene un yu na kas òf pa laga e keda mas tantu tempu na akohida pa mucha. Alabes nos ta hasi un yamada riba mayornan/kuidadónan, den kaso ku nan tin kualke pregunta òf preokupashon, pa tuma kontakto ku e direktivanan di skol, ku Entidat Públiko Boneiru òf ku e unidat di Ministerio di Enseñansa, Kultura i Siensia den Área Karibense (OCW CG). Huntu nos ta sigui traha riba solushonnan duradero pa e nesesidat kresiente pa enseñansa na Boneiru.
Kontakto:
- Entidat Públiko Boneiru: (+599) 715 5330
- Empleado públiko di enseñansa obligatorio: (+599) 777 2296
- Unidat di Ministerio di Enseñansa, Kultura i Siensia den Área Karibense (OCW CG): (+599) 715 8319
- Fundashon ‘Leren is Leuk’: (+599) 717 4301
- Fundashon ‘Birgen Maria Onderwijs’: (+599) 717 8393
- Fundashon Enseñansa Públiko Boneiru: (+599) 717 6380
- Fundashon Kada Mucha un Talento Boneiru - Stichting Ieder Kind een Talent Bonaire (+599) 787 2333
