E departamento di Salubridat Públiko ta urgi siudadanonan pa usa tèst propio n a un manera inteligente. Un persona ku tèst positivo ku un tèst propio, mester bai mesora den isolashon i yama 0800 0800 pa tèst di nobo na e kaya di tèst. Den kaso di un resultado positivo di e tèst propio, habitantenan di mesun kas i kontaktonan estrecho di e persona mester bai mesora den karentena.
Tèstnan propio ta ménos eksakto ku e tèst ku Salubridat Públiko ta hasi den e kaya di tèst. Por sosodé ku e tèst propio ta duna un resultado positivo, miéntras e persona ta tèst negativo den e kaya di tèst. P’esei Salubridat Públiko ta konsehá tur hende ku un resultado positivo di e tèst propio, pa tèst di nobo. E bentaha ta tambe ku un hende ku a tèst positivo, i despues negativo, sa sigur ku e por sali for di isolashon. I ku su kontaktonan estrecho por sali for di karentena.
Tin un otro motibu tambe pa ora tin un resultado positivo di un tèst propio, hasi un tèst. Pa algun pais, biaheronan ku a haña COVID-19, obligatoriamente mester presentá un prueba di rekuperashon. Un persona ku tabatin COVID-19 por haña un prueba di rekuperashon solamente si e por mustra resultado positivo di un tèst di PCR.
E tèstnan propio ku siudadanonan mes por hasi na kas, ta hopi popular awor. Tambe na Boneiru. Hopi biaha ta usa tèst propio pa siguridat, òf promé ku un hende bai un kaminda. Ta usa nan tambe ora un hende tin keho òf tabatin kontakto ku un hende kontagiá. Tur hende por hasi un tèst propio nan mes na kas. No ta importá ku un hende a pasa e anguanan di corona òf nò. Òf ku un hende a yega di haña corona.
Algun hende no mester hasi tèst propio ora nan tin keho, pero mesora un tèst di PCR. Ta bai pa hendenan ku un salú delikado i e hendenan ku ta den nan besindario. Por ehèmpel kompañeronan di kas i kolega. Salubridat Públiko ta konsehá e hendenan akí urgentemente pa ora tin keho no hasi tèst propio. E konseho urgente na nan ta pa yama 0800 0800 pa un sita pa hasi un tèst di PCR.
Promé ku un persona hasi e tèst propio, ta importante pa lesa e foyeto di informashon bon. Na Boneiru tin tèst propio na benta na diferente lugá, entre otro na botika, tienda di kosmétika i artíkulo di salú, supermerkado.
