Proyekto di infrastruktura Tanki Matrimonio: mehorashon di kaminda i desagwe

Entidat Públiko Boneiru (EPB) ta trahando na diferente sitio na nos isla riba mehorashon di infrastruktura. Un di e proyektonan ku aktualmente ta den ehekushon ta e di dos fase di e Proyekto Tanki Matrimonio. Durante e fase aki, EPB ta poniendo klenku den vários kaya den e bario akí despues ku a inverti den mehorashon di e fundeshi i a implementá un sistema di desagwe sólido.

Resientemente EPB a pone un bòrchi di proyekto i desvelá esaki ofisialmente, di manera ku habitantenan i usuarionan di kaminda ta keda informá tokante e trabounan i progreso di e proyekto.

E trabounan na Tanki Matrimonio a kuminsá na aña 2025 ku mehorashon di e suela. Na kuminsamentu di aña 2026 nan a kuminsá ku ponementu di klenku di entre otro Kaya Zjiar, Kaya Fogon, Kaya Trepochi, Kaya Gobi, Kaya Poron, Kaya Stelchi, Kaya Basenia, Kaya Kasuela, Kaya Tinashi, Kaya Tuba, Kaya Pal’i Funchi i Kaya Pal’i Lele. Ku drechamentu di e kayanan akí, EPB ta traha riba mihó aksesibilidat, mas siguridat di tráfiko i un desague funkshonal.

Ehekushon di e proyekto a kuminsá den luna di yanüari i e ta kana segun planifikashon. Entretantu a finalisá e promé kaya dentro di e proyekto. Ku esaki e promé resultadonan visibel den e bario ta un echo.

Un parti importante di e proyekto ta konstrukshon di un sistema fuerte i sostenibel di un  desagwe. Un bon drenahe di awa ta hunga un ròl grandi na momentu di konstrukshon di kaminda na Boneiru. Pa medio di drenahe efektivo pa awa di yobe, e kamindanan ta keda mihó protehá i nan por keda mas tantu tempu den bon estado.

Direktor interino Ligwino Leito ta aksentuá importansia di e trabounan akí: “Ku Proyekto Tanki Matrimonio nos ta atendé ku vários kaya pareu den un bario i nos ta sòru mesora pa un sistema sólido di desagwe. Di e manera akí nos ta traha riba kamindanan sostenibel i mihó infrastruktura pa e habitantenan. Na mes momentu ta hasiendo preparashon di diferente sitio na Boneiru pa bai ehekutá trabounan similar pa paso paso mehorá infrastruktura na nos isla.”

Entidat Públiko Boneiru ta sigui informá nos komunidat tokante progreso di e trabounan.