Prohibishon pa kachó riba bichnan i áreanan di kosta designá na Boneiru

For di 14 di febrüari 2012 ta prohibí na Boneiru pa bai ku kachó na sierto bichnan i áreanan di kosta òf pa laga nan kana einan. Di e manera akí gobièrnu ta protehá bishitantenan i naturalesa.

Kada biaha tin mas hende ta bai ku nan kachó ora nan ta bai bich. Den sierto kasonan esaki ta sòru pa riesgo pa otro usuarionan di bich. Pa evitá aksidente i insidente ku mordementu, pa e motibu akí riba algun bich i área di kosta un prohibishon ta na vigor. Na e sitionan akí hende no tin mag di bai ku kachó, tampoko si nan ta kana ku e kachó mará.

E prohibishon ta kontribuí tambe na protekshon di naturalesa. Kachó por koba saka nèshi di turtuga òf nan por resultá den un área vulnerabel di naturalesa, manera Pekelmeer, ku riba nivel internashonal tambe ta protehá. Banda di esaki shushi di kachó riba bich por sòru pa problema higiéniko pa hende, pero tambe pa nos founa.

Pa informá bishitantenan bon, gobièrnu a pone bòrchi na e bichnan i áreanan di kosta en kestion. Riba e bòrchinan tin bon kla indiká na unda e prohibishon ta konta. E prohibishon ta entre otro aplikabel na Sorobon, Cai i den henter e área entre Waf di Salt Company i Willemstoren, bou di kua Pink Beach i Peleké tambe ta kai.

Ta pèrmití sí pa kana ku kachó entre Punt Vierkant i Waf di Salt Company i entre Willemstoren i Sorobon, pero e ora ei solamente a lo largo di kosta.

Kachó ta prohibí riba e siguiente bichnan i áreanan di kosta:    

• Playa Lechi (Sunset Beach)
• Playa Pal’i Mangel (Donkey’s Beach i Te Amo Beach)
• Forn’i Kalki (Bachelor’s Beach)
• E área for di Saliña (Waf di Salt Company) te Lacre Punt (Willemstoren)
• Sorobon i Cai
• Piedra Haltu (Thousand Steps)
• Tolo
• Nukove
• Klein Bonaire

Banda di esaki ta prohibí pa subi riba tereno di Cargill Salt Company (parti paden di e kaminda) sin pèrmit.