Polushon di plèstik ta un tópiko di rònt mundu i tin un empeño global pa redusí plèstik ku ta usa un solo biaha dor di prohibí uso di produkto manera saku di plèstik, richi i baki di stirenofom pa tuma kuminda bai kuné. E Gobièrnu lokal di Boneiru ta pro redukshon di plèstik i ta trahando aktivamente riba implementashon di un prohibishon. E prohibishon akí lo no tin impakto riba solamente negoshi lokal, manera hotèl ku restorant pero tambe riba nos tur ku ta biba na Boneiru. Pa e motibu akí Boneiru Duradero (BD) ta lansa un Programa Grátis di Siña Online bou di título Beyond Plastics. A desaroyá e programa online den koperashon ku e Konsùltent Medioambiental Travel Without Plastic. I e ta krea oportunidat pa tur hende na Boneiru pa siña DIKON nos tin ku redusí uso di plèstik i KON nos por yega na redukshon di plèstik.
E Programa di Siña Online ta posibel ku fondo di World Wide Fund for Nature na Hulanda. E programa ta risibí sosten di e siguiente organisashonnan lokal klave: Entidat Públiko Boneiru, Selibon, Kámara di Komersio, BONHATA i Tourism Corporation Bonaire. E partnernan lokal akí lo hunga un papel importante ku nan asistensia di plamamentu di e mensahe tokante e Programa di Siña Online pa diferente oudiensia na Boneiru. Klek riba e lenk akí https://onlinelearning.boneiruduradero.nl pa bai na e Programa di Siña Online.
Tin un grupo di módulo den e Programa di Siña Online di Beyond Plastics ku ta trahá spesialmente pa hotèl, akomodashon i ekskurshon. E módulonan akí ta ofresé dos hèrmèn práktiko (ku por download) ku empresanan por hasi uso di dje:
1. E hèrmèn di evaluashon di bo mes ta hasi e tarea di katalogisá e sorto di plèstik ku ta usa un solo biaha den nan empresa mas fásil pa hotèlnan. Tumando inventario ta yuda tambe pa bira mas konsiente di e volúmen di “plèstik desechabel” ku ta usa pa aña.
2. E tabèl di rekomendashon ta ofresé sugerensia práktiko pa start ku redukshon di plèstik mesora i tal bes yega na baha gastu dor di skohe pa alternativanan mas sabí.
Ademas, tin un módulo di komunikashon disponibel pa yuda empresarionan desaroyá nan propio strategia di komunikashon pa plèstik ku ta usa un solo biaha. Beyond Plastics ta inkluí tambe módulo pa eduká públiko en general, ku ta duna splikashon di e impakto di plèstik ku ta usa un solo biaha riba nos naturalesa i salú. E Programa di Siña Online ta fásil pa usuario i e módulo ta rekirí tiki lesamentu di teksto. Ku un simpel klek por skucha e narador na papiamentu òf na ingles. E módulonan ku ta fásil pa sigui i ta 10-minüt largu por yuda tur hende, for di mucha di skol te na wela, komprendé dikon pa un isla chikitu manera Boneiru ta importante pa redusí plèstik ku ta usa un solo biaha. Por último e wèpsait ta atraktivo pa bista, presentando fotografia profeshonal di Casper Douma, Marcel van der Kamp i Emieck de Goede, ku ta demostrá kon bunita Boneiru ta di bèrdat.
Na novèmber 2020 Boneiru Duradero a lansa e kampaña “Sushi òf Dushi”, pa krea mas konsiensia pa un Boneiru mas limpi. Produktonan di plèstik ku ta usa un solo biaha ta e kousa mayó di polushon na Boneiru. Den teoria, tur hende ta na fabor di un Boneiru limpi, pero den práktika hende ta haña ku ta difísil pa stòp di hasi uso di produkto desechabel, baki di bai ku kuminda aden. BD ta spera ku e Programa di Siña Online ta kontribuí na un mihó komprondementu di e problema di plèstik ku ta usa un solo biaha i na un akseptamentu amplio di futuro prohibishonnan di produkto di plèstik ku ta pone e salú i rikesa di nos isla den peliger.
