Hendenan den gruponan di riesgo por tuma kontakto ku dòkter di kas pa traha un sita pa pasa e angua gratuitamente.
Hendenan riba 60 aña, hendenan ku un problema médiko (manera diabétis, un malesa di kurason, pulmon òf nir) òf ku ménos resistensia, ta kore mas riesgo di salú ora nan haña grip. Si un hende pasa e angua kontra grip, su kurpa ta reakshoná trahando antikurpa pa e vírùs di grip. Esei ta pone ku e chèns pa haña grip ta bira ménos. Por sosodé ku e persona akí tòg ta haña grip. E angua kontra grip ta hasi e ora ei ku e persona ta bira ménos malu i e chèns pa komplikashon, manera pulmonia òf problema ku kurason, ta bira ménos.
Pa un bon protekshon, un hende mester pasa e angua kontra grip tur aña di nobo. E mihó manera ta pa hasi esaki promé ku komienso di e temporada di grip, ku mayoria biaha ta kore di desèmber pa mart. Despues ta dura mas o ménos dos siman promé ku e angua kontra grip kuminsá traha.
Grip ta plama di mes manera ku COVID-19. P’esei tosa i nister den èlebog òf den un lensu di papel i laba man regularmente ku awa i habon. E angua kontra grip ta protehá solamente kontra e vírùs di grip. Pues personanan ku a pasa e angua kontra grip, no ta protehá kontra otro vírùs manera e vírùs ku ta duna fèrkout òf e vírùs di corona.
E aña akí ta ofresé tambe, meskos ku na Hulanda Oropeo, e bakunashon kontra pneumokokken pa personanan entre 60 i 80 aña. Por pasa e bakunashon kontra pneumokokken pareu ku e angua kontra grip na bo dòkter di kas.
Tuma kontakto ku bo dòkter di kas pa un sita òf pa wak si bo ta bin na remarke pa e angua kontra grip i/òf e angua kontra pneumokokken. E Departamento di Salubridat Públiko di Entidat Públiko Boneiru huntu ku dòkternan di kas ta organisá e programa.
Wak pa mas informashon: https://bonairegov.com/pa/habitante/bakunashon-kontra-grip
