Entidat Públiko Boneiru ta hasi un yamada riba tur habitante i empresario pa entregá nan petishonnan pa pèrmit i nan notifikashonnan pa aktividat ku ta tuma lugá entre 12 di desèmber 2025 i 11 di yanüari 2026 na tempu. Ta trata akí di petishon pa pèrmit pa evento, pèrmit pa bufèt i pèrmit pa benta i tiramentu di vürwèrk (riba kaya). E fecha mas tardá pa entregá esakinan ta 7 di novèmber 2025.
Pèrmit i notifikashon
Pa organisá evento públiko i presentashon di grupo musikal manera gaita, aguinaldo, barí i tambú, un pèrmit ta obligatorio. Minimalmente dos dia promé ku un presentashon mester hasi notifikashon di esaki na departamento di tráfiko di Kuerpo Polisial Hulanda Karibense. Pa presentashon na ‘kiosko’, tin un término di notifikashon di por lo ménos un (1) siman na vigor.
No ta duna pèrmit pa presentashon na e siguiente sitionan:
* Henter Kaya Korona,
* Ons Hoekje na Kaya Avelino J. (Abechi) Cecilia,
* Skina di Kaya L.D. Gerharts i Kaya Lib. Simon Bolivar,
* Skina di Kaya Grandi i Kaya L.D. Gerharts,
* Kaya Nikiboko Nort i Kaya Nikiboko Sùit,
* Kas di Hadrei na Bulevar Miguel Pourier.
Ta pèrmití presentashon na ‘kiosko’ na Plaza Fraternan di Tilburg únikamente riba djadumingu, ku eksepshon di e oranan ku tin santu sakrifisio di misa den Misa di San Bernardo.
Prosedura i kondishonnan
Entregá petishon: Mester entregá tur petishon digitalmente via https://bonairegov.com/ondernemers/vergunningen
Benta i tiramentu di vürwèrk: Pa bende i tira vürwèrk un pèrmit (pa benta riba kaya) ta obligatorio. Por entregá petishon pa esaki tambe pa mas tardá 7 di novèmber 2025.
Gastu di limpiesa: Pa evento kaminda ta hasi uso di vürwèrk, mester tuma kontakto adelantá ku Selibon NV i mester entregá un komprobante di pago di gastu di limpiesa òf un komprobante di pago di un suma di garantia huntu ku e petishon pa pèrmit.
Fecha mas tardá pa hasi petishon pa pèrmit i pa buska esaki
Pa haña un bon bista general di tur e aktividatnan planiá pa òrden públiko i siguridat, a stipulá e fecha mas tardá pa entregá tur petishon i pa hasi notifikashon, riba dia 7 di novèmber 2025. No ta tuma petishon ku keda entregá despues di e fecha akí den tratamentu. Mester buska tur pèrmit pa kua a hasi petishon promé ku dia 7 di novèmber 2025, pa mas tardá dia 18 di desèmber 2025 na Kaya Industria Pariba 28.
Sin e pèrmit rekerí bo ta den violashon i nos por tuma medida atministrativo òf penal.
Pa mas informashon bo por tuma kontakto ku departamento di Asuntunan Hurídiko i General di Entidat Públiko Boneiru, òf pa pèrmit di bufèt ku direktorado di Planifikashon i Desaroyo via e number di telefòn 715 5330.
