Entidat públiko Boneiru ta hasi un yamada riba tur habitante i empresario pa entregá nan petishon pa pèrmit i hasi notifikashon di aktividat ku ta tuma lugá entre 13 di desèmber 2024 i 12 di yanüari 2025 na tempu. Ta trata akí di petishon pa pèrmit pa evento, pèrmit di bufèt i pèrmit pa benta di vürwèrk (kantu di kaya) i tiramentu di vürwèrk. E fecha mas tardá pa entregá esakinan ta 15 di novèmber 2024.
Pèrmit i notifikashon
Pa organisá evento públiko i presentashon di grupo musikal manera gaita, aguinaldo, barí i tambú, un pèrmit ta obligatorio. Minimalmente dos dia promé ku un presentashon, mester hasi notifikashon di esaki na e departamento di tráfiko di Kuerpo Polisial Hulanda Karibense. Pa presentashon na ‘kiosko’, un término di notifikashon di por lo ménos un (1) siman ta na vigor.
No ta duna pèrmit pa presentashon na e siguiente sitionan:
* Henter Kaya Korona,
* Ons Hoekje na Kaya Avelino J. (Abechi) Cecilia,
* Skina di Kaya L.D. Gerharts i Kaya Lib. Simon Bolivar,
* Skina di Kaya Grandi i Kaya L.D. Gerharts,
* Kaya Nikiboko Nort i Kaya Nikiboko Sùit,
* Kas di Hadrei na Bulevar Miguel Pourier.
Ta pèrmití presentashon na e ‘kiosko’ na Plaza Fraternan di Tilburg solamente riba djadumingu, ku eksepshon di e oranan ku ta tene sirbishi di misa den Misa San Bernardo.
Prosedura i kondishonnan
Entregá petishon: Mester entregá tur petishon digitalmente via https://bonairegov.com/pa/empresarionan/permitnan.
Benta i tiramentu di vürwèrk: Pa bende i tira vürwèrk un pèrmit (pa benta kantu di kaya) ta obligatorio. Mester entregá petishon pa esakinan tambe pa mas tardá 15 di novèmber 2024.
Gastu di limpiesa: Pa evento kaminda ta hasi uso di vürwèrk, mester tuma kontakto adelantá ku Selibon N.V. i mester entregá un komprobante di pago di gastu di limpiesa òf un depósito (bòrg) huntu ku e petishon pa pèrmit.
Fecha mas tardá pa petishon/notifikashon i último fecha pa buska bo pèrmit
Pa haña un bon bista di tur e aktividatnan planiá pa òrden públiko i siguridat, a stipulá e fecha mas tardá pa entregá tur petishon i hasi notifikashon dia 15 di novèmber 2024. No ta tuma petishon ku keda entregá despues di e fecha akí den tratamentu. Mester buska tur pèrmit pa kua a hasi petishon promé ku 13 di novèmber 2024, pa mas tardá dia 20 di desèmber 2024 na Kaya Industria Pariba 28.
Sin e pèrmit rekerí bo ta kometé violashon di lei i nos por tuma medida atministrativo òf penal.
Pa mas informashon bo por tuma kontakto ku departamento di Asuntunan Hurídiko i General (JAZ) di entidat públiko Boneiru, òf pa pèrmit di bufèt ku direktorado di Planifikashon i Desaroyo via e number di telefòn 715 – 5330.
