Ta konsehá hende ku ta biaha pa eksterior pa trabou òf vakansi pa traha un sita na tempu na e konsulta pa biahero di GGD Bonaire / Salubridat Públiko. Na e konsulta pa biahero bo ta haña konseho personal i eventual bakunashon.
Dikon konseho di biahe ta importante
Na diferente pais tin malesa di infekshon ku por ta un riesgo pa salú di biahero for di Boneiru. Ku un sita na e konsulta pa biahero bo ta haña konseho ku ta kuadra ku bo ruta di biahe, bo salú i bo aktividatnan.
Kentura hel na Venezuela i otro paisnan na Suramérika
Aña pasá GGD Bonaire / Salubridat Públiko a mèldu un brote di kentura hel na Brasil i Colombia. Na fin di luna di febrüari Venezuela tambe a mèldu un brote.
Pa e motibu akí GGD Bonaire / Salubridat Públiko ta pidi atenshon èkstra pa e bakunashon kontra kentura hel pa biaheronan pa Venezuela òf pa otro paisnan kaminda tin kentura hel, manera Guyana Franses, Brasil i Colombia. Kentura hel ta un malesa ku por desaroyá na un manera grave.
Ta importante pa pasa e angua kontra kentura hel por lo ménos 10 dia promé ku salida. E angua kontra kentura hel ta duna protekshon pa bida largu.
Sarampi na Colombia i den region
Den e lunanan tras di lomba, na Nortamérika i Suramérika nan a mèldu vários brote di sarampi. Esaki a sosodé entre otro na Colombia, Bolivia, Brasil, Paraguay, Belize, México, Merka i Canada. Anteriormente e aña akí, Boneiru tambe mester a atendé ku un bishitante ku sarampi.
Sarampi ta un malesa sumamente kontagioso ku un vírùs ta okashoná. Hende por haña sarampi si nunka nan no tabatin e malesa akí i nan no a pasa angua. Mucha ta pasa angua kontra sarampi via e ofisina di konsulta. Si tin pregunta, biaheronan por tuma kontakto ku GGD Bonaire / Salubridat Públiko pa konseho i/òf un sita na e konsulta pa biahero.
Chikungunya den region
Den luna di febrüari Sürnam a mèldu un brote di chikungunya, kaminda dos hende a fayesé. Na Guyana, Guyana Franses, Brasil i Saint Lucia tambe nan a méldu kaso nobo resientemente. Pa basta tempu kaba Cuba ta konfrontando malesa di sangura manera chikungunya i dengue. Na Aruba i Hulanda Oropeo tambe nan ta mira mas kaso serka biaheronan for di Sürnam i Cuba.
Chikungunya, meskos ku dengue, ta un malesa ku sangura ta transmití. Mayoria biaha e malesa no ta un peliger pa bida di hende, pero e doló di skarnir tin ora por dura largu. No tin un tratamentu kontra chikungunya. Pa e motibu akí ta importante pa evitá piká di sangura i konsiderá pa pasa angua.
Traha un sita na tempu na e konsulta pa biahero
No warda te djis promé ku salida. Sierto anguanan ta traha te despues di algun dia.
E konsulta na e konsulta pa biahero ta grátis. Bo ta paga solamente pa e anguanan. Durante e konsulta bo ta haña konseho personal tokante protekshon kontra malesa di infekshon manera kentura hel, sarampi i chikungunya, i tokante otro riesgo di salú na bo destinashon. Ku un solo bishita na e konsulta pa biahero bo sa eksaktamente kon bo por protehá bo mes i bo por biaha den tur trankilidat.
Por traha un sita via e number di telefòn +599 715 5324. Gustosamente nos ta yuda bo pa biaha na un manera seif i bon prepará. Entidat Públiko Boneiru, departamento di GGD Bonaire / Salubridat Públiko a presentá e mensahe akí.
