Orguyosamente Entidat Públiko Boneiru (EPB) ta reflehá riba su partisipashon eksitoso na e Feria FRED 2025, ku a tuma lugá djasabra, 18 di òktober, na WTC Rotterdam. Durante e feria, e tim di EPB a topa ku hopi bishitante entusiasmá, entre nan hopi yu di tera i profeshonalnan bon kalifiká ku a ekspresá interes pa traha i biba na Boneiru.
Bishitantenan tabata entusiasmá tokante tur oportunidat di karera na EPB. Ku energia i ekspertisio, koleganan di EPB a papia tokante nan trabou, e vakaturanan disponibel, i e diferensia ku nan por hasi pa Boneiru. E kombersashonnan aki ku studiantenan, profeshonalnan i spesialistanan eksperensiá a hasié un dia eksitoso.
“Tabata ‘great’ pa topa ku asina tantu yu di tera profeshonal ku diferente estudio kompletá i ku eksperensia amplio riba nan tereno. Nos ta kontentu ku nan ke regresá i kontribuí na futuro di nos isla”, segun sekretario insular suplente Roxanne Francees.
Partisipashon na e Feria di FRED ta parti di e kampaña di rekrutá mas amplio di EPB, ku aktivamente ta atraé talentonan nobo tantu na Boneiru komo den eksterior.
Entidat Públiko Boneiru ta gradisí tur bishitante ku a pasa bishitá su stènt i ta invitá esnan interesá pa bishitá www.bonairegov.com pa wak tur vakatura tur ku tin habrí i apliká!
