Pa selebrá lesamentu i bon uso di idioma Biblioteka Públiko Boneiru ta regalá buki durante dos dia, kuminsando riba dia 8 di sèptèmber kual ta Dia di Alfabetismo.
Riba dia 8 di sèptèmber por pasa entre 08:00or pa 16:30or i riba dia 9 di sèptèmber por pasa entre 08:00or i 11:30or na Kaya Gramèl z/n. Durante e 2 dianan aki tur hende ta bon biní pa pasa na biblioteka i skohe den un variashon amplio di buki i nan por bai ku un maksimo di 5 buki pa persona. Lo tin buki disponibel pa tur edat i na 4 idioma (papiamentu, hulandes, spañó i ingles).
Maneho di biblioteka ta responabel pa e kolekshon di buki keda optimal, atraktivo i tambe interesante pa tur lesadó. Esaki ta trese ku n’é ku mester saka kolekshon bieu pa asina nobo por drenta. Na e momentu aki, biblioteka ta drechando su kolekshon di buki i esaki ta e motibu di e regalo bunita aki riba un dia asina spesial.
E tim di biblioteka ta spera di mira hopi lesadó i futuro lesadó pasa i hasi uso di e oportunidat aki pa asina kultivá lesamentu aki na Boneiru. Por usa e momentu aki tambe pa bira miembro di biblioteka òf fia buki. Por haña mas informashon riba nos página di facebook ‘Biblioteka Públiko Boneiru’ i tambe por tuma kontakto ku Biblioteka públiko via 715-5344 òf por bishitá biblioteka na kaya Gramèl z/n.
