a bai di akuerdo ku e proposishon di lei di Sekretario di Estado Szabó (Digitalisashon i Relashon den Reino) ku ta hasi introdukshon di e number di servisio pa siudadano (BSN) i e fasilidatnan ku gobièrnu digital ta hasi posibel na Boneiru, Sint Eustatius i Saba.
Sekretario di Estado Szabó: “Tur hende na Hulanda tin derecho riba bon servisio di gobièrnu. Introdukshon di e BSN ta e promé paso importante pa mehorá e servisio digital di gobièrnu pa habitantenan di Boneiru, Sint Eustatius i Saba. Solamente ku un sistema seif pa identifikashon di persona i un gobièrnu digital fuerte, nos por sòru pa un futuro kaminda ku tur hende por regla asuntu ku gobièrnu di un manera fásil, konfiabel i seif, na e balinan i onlain.”
Mihó servisio di gobièrnu
E proposishon di lei entre otro ta hasi posibel pa e habitantenan di Boneiru, Sint Eustatius i Saba haña un BSN i pa e gobièrnu lokal tin pèrmit pa usa BSN i DigiD. Ku un BSN, e habitantenan por pidi un DigiD i ‘log’ in riba wèpsaitnan di gobièrnu. Asina, den futuro habitantenan di Boneiru, Sint Eustatius i Saba tambe lo por regla kada bes mas asuntu onlain ku e gobièrnu lokal. Habitantenan tambe lo por regla asuntu onlain mesora ku gobièrnu i organisashonnan na Hulanda Oropeo ku ta konektá riba DigiD. Esaki por ehèmpel ta kumbiní futuro studiante kulo por regla nan asuntunan di estudio na Hulanda Oropeo mas lihé. E BSN ta un number personal úniko i ku ta respetá privasidat.
Seif i aksesibel
Lo introdusí e BSN i e Wet digitale overheid (Wdo, Lei gobièrnu digital) paso a paso den e sistema i prosesonan eksistente na Boneiru, Sint Eustatius i Saba. Promé e habitantenan ta haña un BSN, i lo registrá e numbernan den e atministrashondi poblashon lokal. Den e añanan benidero, mas organisashon di gobièrnu lo por kambia pa uso di BSN i e DigiD, na momentu ku adaptá e sistemanan.
Pa organisashonnan ku ke konektá riba DigiD, e mesun eksigensianan di seguridat lo bai konta ku na Hulanda Oropeo.Tambe, den futuro lo bin un evaluashon propio obligatorio pa kolegionan ehekutivo pa anualmente investigá seguridat i konfiabilidat di e registrashon di poblashon. Ademas, ta importante pa habitantenan haña bon informashon tokante introdukshon di e BSN i servisionan online nobo di gobièrnu.
Amiendanan
Tweede Kamer tambe a bai di akuerdo ku e amiendanan tokante e tarheta di identidat BES (sédula) i uso obligatorio di datonan ku miembronan White i Kathmann (Groenlinks-PvdA) a presentá na e lei.
E amienda tokante uso obligatorio di datonan ta regla ku organisashonnan di gobièrnu tin e obligashon di hasi uso di e datonan personal ku Entidat Públiko tin.Tambe, nan tin e obligashon di mèldu datonan inkorekto na Kolegio Ehekutivo ku ta responsabel.
E amienda tokante e sédula ta sòru pa, despues di un término, inkluí e BSN riba e sédula, di moda ku e siudadano tin e number semper na man.
Kontinuashon Eerste Kamer
Awor lo presentá e proposishon di lei na Eerste Kamer. Ora Eerste Kamer bai di akuerdo, e kambionan di lei ta bira definitivo.Ta premirá ku habitantenan di Boneiru, Sint Eustatius i Saba lo haña un BSN durante 2025.
