For di luna di sèptèmber tin kurso ta kuminsá atrobe. Pa motibu di e éksito i petishon pa ripitishon, dia 19 di sèptèmber e kurso ‘Abilidat Sosial’ ta ranka sali, siguí pa e kurso ‘Atenshon pa Kliente i Enfoke riba Kliente’ ku ta kuminsá dia 21 di sèptèmber. E lèsnan ta riba djamars i djaweps for di 18.00 or te 20.00 or i nan ta dura 8 òf 12 siman. Tin un kantidat limitá di lugá pa kada kurso.
E kursonan ta na papiamentu i nan ta pa hende ku ya kaba ta traha den sektor turístiko, pero tambe pa hende for di otro sektornan ku ke mehorá nan abilidatnan. Entidat Públiko Boneiru ke un sektor turístiko salú, kaminda e enfoke ta riba turismo di kalidat i riba embolbimentu di nos komunidat. Esaki ta pará tambe den nos ‘Plan di Rekuperashon di Turismo’. E meta ta pa nos tin un turismo ku ta bon pa nos abitantenan. Nos komunidat lokal ta hopi importante pa desaroyo di turismo, preservashon di nos identidat i nos kultura, i pa realisá un turismo sostenibel.
Nos ke pa e turismo di kalidat ta benefisioso tambe pa nos poblashon lokal. Pero tin ora tin un diferensia entre loke ta nesesario i kua ta e abilidatnan ku ta disponibel na nos isla. Pa e motibu akí Entidat Públiko Boneiru, huntu ku TCB i BONHATA, for di luna di sèptèmber ta organisá kursonan nobo i grátis na Fundashon FORMA. E meta mas importante ta pa oumentá konosementu lokal i krea mihó oportunidat pa trabou pa hendenan ku anteriormente a haña treinen kaba.
Diputado Craane ta bisa: ‘Turismo ta e sektor mas grandi na nos isla i e ta brinda hopi posibilidat pa trabou i kresementu. Ku e kursonan akí nos ke duna nos hendenan e oportunidat pa siña i ku esaki mehorá nan chèns pa haña trabou i entrada. Turistanan tin gana di hasi kontakto ku nos abitantenan lokal i siña di nan tokante nos kultura i nos isla. Koperá ku esaki por trese hopi apresio, entrada mas haltu i eksperensianan positivo. Mas ku 60 hende ya kaba a partisipá na e kursonan ku nos ta ofresé i awor akí nan ta eksperensiá e bentahanan di esaki. Mi ta enkurashá tur hende pa hasi uso di e bunita oferta akí!’
Den e temporada binidero ta amplia e oferta di kurso. Keda na altura via Openbaar Lichaam Bonaire, Gobièrnu di Boneiru, Fundashon FORMA, Tourism Corporation Bonaire i BONHATA i Facebook.
Pa mas informashon tuma kontakto via forma.training@bonairegov.com òf yama / manda WhatsApp na +599 715 5330.
