Kuminsando 15 di òktober 2025, habitantenan di Boneiru por asistí na un konsulta nobo di salú seksual na Salubridat Públiko (GGD Bonaire). E ora di konsulta akí ta pa tur hende ku tin pregunta tokante amor, sèks, relashon, antikonseptivo, òf soa (malesa transmití seksualmente, MTS). Tambe bo por hasi un tèst di soa grátis i anónimo. Por alkansá e enfermero(a)nan via telefon òf WhatsApp na +599 7907373.
Salubridat Públiko (GGD Bonaire) ke pa tur hende sinti nan mes sigur i kómodo ora ta trata di salú seksual. No ta tur hende ta haña ku ta fásil pa buska yudansa. P’esei mes e ora di konsulta aki ta aksesibel i anónimo, dunando tur hende oportunidat pa hasi pregunta i risibí sosten.
Durante e ora di konsulta, bo por papia ku un enfermero(a). Nan lo skucha, ofresé konseho i yuda ku kualke pregunta òf preokupashon. Bo por hasi un tèst di soa (malesa transmití seksualmente, MTS) grátis tambe. E konsultanan ta pa tur hende ku tin mester di informashon òf asistensia. E enfermero(a)nan ta papia papiamentu, hulandes, ingles i spañó.
E konsultanan ta tuma lugá na vários sitio na nos isla. E enfermero(a)nan ta disponibel di djaluna pa djabièrnè di 8:00 AM pa 5:00 PM. Habitantenan por yama òf manda un mensahe di WhatsApp na +599 7907373 pa mas informashon òf pa traha un sita.
E ora di konsulta ta un añadishon riba e kuido eksistente na Boneiru. Ku e inisiativa akí GGD Bonaire ke kontribuí na informashon aksesibel, prevenshon i guia personal, di manera ku tur hende por haña e kuido korekto na e momentu korekto. Esaki ta yuda pa redusí e riesgo pa soa (malesa transmití seksualmente, MTS) i embaraso no intenshoná.
Na mes momento ku inisio di e ora di konsulta, GGD Bonaire ta ekspandé e kantidat di mashin di benta di kondon na Boneiru. Por usa e mashinnan na un manera anónimo i un kondon ta kosta solamente $0.50. Por haña e lista kompletu ku tur e sitionan kaminda tin mashin di kondon riba wèpsait di Gobièrnu di Boneiru via e lenk (https://bonairegov.com/pa/habitante/kondon-automaat) akí.
