Biblioteka Públiko Boneiru pronto ta bira un lugá kaminda por debatí, sera konosí ku arte i kultura i un punto pa haña informashon. Natural Biblioteka Públiko Boneiru ta keda un kaminda literatura i stimulá pa lesa ta para sentral. Pa logra esaki diputado Nina den Heyer i minister Ingrid van Engelshoven resien a firma un akuerdo di intenshon.
E akuerdo di intenshon ta sostené e kolaborashon entre ministerio di Enseñansa, Kultura i Siensia (OCW), Entidat Públiko Boneiru i Biblioteka Públiko Boneiru pa elevá e biblioteka te na e nivel ku e Lei strukturashon fasilidatnan biblioteka públiko (Wet stelsel openbare bibliotheekvoorzieningen - Wsob) tin komo meta. Konforme e lei akí bibliotekanan na Hulanda mester ta kapas pa kumpli ku sinku tarea importante, esta:
- Pone konosementu i informashon disponibel;
- Ofresé posibilidat pa desaroyo i edukashon;
- Promové lesamentu i laga sera konosí ku literatura;
- Organisá enkuentro i debate;
- Laga sera konosí ku arte i kultura.
Na e momentu akí Biblioteka Públiko Boneiru no por funshoná na e nivel ku Wsob ta preskribí. Un problema importante ta e sitio kaminda e biblioteka ta ubiká aktualmente, ku ta hasi imposibel pa kumpli ku e tareanan akí. Ku firmamentu di e akuerdo di intenshon a pone un promé paso pa traha konhuntamente riba esaki. Den kolaborashon ku Entidat Públiko Boneiru i Biblioteka Públiko Boneiru, ministerio di Enseñansa, Kultura i Siensia ta duna sosten na un grupo di trabou pa desaroyá e fasilidat di biblioteka na Boneiru mas aleu pa yega na e nivel ku sí ta akseptabel i ku ta kumpli ku Wsob.
Banda di Wsob for di 30 di sèptèmber 2020 e konbenio di biblioteka 2020-2030 tambe ta na vigor na Hulanda. E konbenio akí ta enfoká riba fortifikashon di tareanan sosial, esta mehorashon di promoshon di lesamentu, inklushon digital i edukashon permanente. Pa Biblioteka Públiko Boneiru ta konta ku ta hasi un asina yamá ‘nulmeting’ di e tareanan sosial na Boneiru pa asina inventarisá e nesesidatnan. Di e forma akí por wak kon e biblioteka por bai kontribuí mihó na e desafionan sosial ku ta eksistí.
