Últimamente tabata tin konmoshon den komunidat tokante e situashon relashoná ku un negoshi ambulante ku ta stashoná riba malekon na Playa. Entidat Públiko Boneiru (EPB) ta haña importante pa klarifiká e echonan den e kaso aki.
Ta asina ku Direktorado di Supervishon i Mantenshon (T&H) di Entidat Públiko Boneiru a risibí e aña aki un keho tokante molèster dor di un negoshi ambulante ku ta bende kos di kome riba malekon. Konforme prosedura normal, T&H a investigá e keho. E maneho fiho den kasonan asin’aki ta, ku (1) bendedó ambulante (‘venter’) no ta permití pa okashoná molèster òf opstákulo, i (2) bendedó ambulante ku ta okupá un sitio fiho mester paga prekario pa esaki.
For di e investigashon di T&H a sali na kla, ku e bendedó tabata kuminsá hasi preparashon pa bende kos di kome for mainta trempan i ku e tabata kuminsá bende na un ora mas trempan ku su pèrmit tabata stipulá. A determiná tambe ku e bendedó tabata stashoná riba tereno públiko. A base di e resultado di e investigashon i e maneho eksistente, a aserká e bendedó pa dialogá i yega na un solushon pa prevení molèster na e sitio. A pidi e bendedó pa muda di sitio. E bendedó mes a proponé pa muda na un sitio fiho dilanti di e edifisio di SKAL. Direktorado T&H a komuniká e proposishon aki ku Direktorado di Planifikashon i Desaroyo (R&O). Despues ku R&O a evaluá e proposishon, a duna un konseho positivo i departamento di asuntunan hurídiko a otorgá e pèrmit nobo. Despues ku a saka e pèrmit a urgi e bendedó pa muda pa e sitio nobo.
Entidat Públiko Boneiru di Boneiru ke enfatisá ku den e kaso aki a sòru debidamente pa a atendé korektamente ku tur partido i tene kuenta ku kada un su interes. Entidat Públiko Boneiru ta aktua ophetivamente segun lei i regla, esei ta nifiká ku e orígen di un persona nunka no mag influensia e forma di atendé un kaso. Ta di lamentá ku ta kue e kaso aki pa trese divishon entre gruponan den nos komunidat. Nos ta un komunidat eksepshonal ku un poblashon hopi diverso. Laga Boneiru ta un bunita ehèmpel di kon tur hende por biba ku otro den harmonia i trata nos próhimo ku rèspèt.
