Ofisina di haf será temporalmente pa renovashon

Ofisina di haf ta será temporalmente te ku djabièrnè 1 di desèmber.

Ofisina di haf ta será temporalmente for di djaluna 27 di novèmber te ku djabièrnè 1 di desèmber pa motibu di trabou di mantenshon planiá. E medida nesesario akí ta parti di nos kompromiso pa mantenshon di standardnan haltu di siguridat i operashonal den nos fasilidatnan di haf.

Durante e periodo akí e siguiente servisionan di lokèt ta temporalmente solamente disponibel na direktorado di Supervishon i Mantenshon di Lei riba djamars i djaweps entre 14:30 or i 16:30 or: 

  • Registrashon di boto nobo
  • Buska karchi di registrashon

Ofisina di Supervishon i Mantenshon di Lei ta alkansabel na Kaya Korona 89.

Ta posibel pa registrá boto nobo via email. Pa otro pregunta òf informashon tokante registrashon bo por tuma kontakto pa medio di email via: boatregistration@bonairegov.com.

Nos ke sigurá nos klientenan i partnernan ku, no opstante ku nos ta será temporalmente pa mantenshon, nos servisionan di pikèt ta keda operashonal. Haf lo ta 24/7 operashonal pa salbaguardiá servisionan esensial i pa tuma eventual kasonan urgente den tratamentu.

Durante e periodo akí agensianan di barku i otro interesadonan te ainda por tuma kontakto ku haf via e kanalnan di komunikashon eksistente. Nos ophetivo ta pa durante e periodo di mantenshon kousa solamente interupshonnan minimal i pa garantisá un kontinuashon di komunikashon sin muchu problema.

For di djaluna 4 di desèmber ofisina di haf lo ta kompletamente operashonal atrobe i habrí pa tur kliente. Nos ta apresiá bo pasenshi i komprenshon durante e periodo di mantenshon esensial akí i nos ta spera di duna bo servisio atrobe ku fasilidatnan i servisionan mehorá.

Pa mas pregunta òf informashon bo por tuma kontakto ku nos via bonairepilots@bonairegov.com.