Kolegio Ehekutivo ta nombra Michael Pieters komo direktor interino di Direktorado di Planifikashon i Desaroyo. E director interino nobo lo ta responsabel tambe pa optimalisashon di servisio di direktorado di Planifikashon i Desaroyo. Pa e trayekto di optimalisashon señor Pieters ta forma un tim di transishon. Señor Pieters tin hopi eksperensia den e aparato públiko. Den pasado e tabata hefe di Domeinbeheer, awendia konosí komo departamento di Realisashon.
Despues ku e diputadonan a identifiká problemanan struktural dentro di e Direktorado di Planifikashon i Desaroyo, Kolegio Ehekutivo ta konsiderá ku optimalisashon di e direktorado aki ta nesesario. E kestionnan ku a konstatá i e optimalisashon deseá di Planifikashon i Desaroyo ta den liña ku e konklushonnan di e rapòrt di ILT (inspekshon di ambiente di biba i transporte). Mester implementá e puntonan di mehorashon ku nan ta menshoná den e rapòrt akí, manera formulashon di planifikashon konkreto, prosesonan di trabou stipulá i mantenshon di e términonan legal pa dunamentu di pèrmit den un forma konstruktivo i proaktivo. Kolegio Ehekutivo ta tuma e direkshon den su man dor di kuminsá ku optimalisashon di e direktorado aki.
Kolegio Ehekutivo ta sòru por ehèmpel pa nos isla mes duna forma na e sistema di Pèrmit, Supervishon i Mantenshon di Lei (VHT). Esaki pa duna entidat públiko Boneiru oportunidat pa mehorá esaki, sigur awor ku tin un Kolegio Ehekutivo nobo ku tin intenshon di implementá vários mehorashon den un forma duradero.
Optimalisashon di e servisio di Planifikashon i Desaroyo ta mehorá tambe e situashon pa empleadonan dentro di e servisio, i tambe pa siudadanonan, empresanan i bishitantenan di Boneiru.
