Den e wikènt tras di lomba nan a sende un boto di piskadó na kandela. Esaki lo a tuma lugá despues ku tabatin un konflikto. No ta kompletamente kla ainda kiko tabata e motibu pa e konflikto akí. Ta hasiendo investigashon di e insidente i lo pèrsiguí i kastigá e malechor.
Ku e palabranan firme: ‘Destrukshon i sendementu di propiedat di otro na kandela, i tambe tuma lei den bo mes man nos no ta tolerá’, gezaghèber ta pone énfasis riba su desaprobashon relashoná ku e insidente den e wikènt tras di lomba. Kada forma di kometé echo kastigabel ta indeseabel, sea ku esaki ta surgi a base di kos di baldadi òf a base di konflikto. Semper mester tin rèspèt pa propiedat di otro. I ora ku tin kestion di konflikto, bo ta solushoná esaki na un otro manera.
Kada insidente kaminda tin kestion di destrukshon ta un menasa serio pa siguridat públiko. Pa e motibu akí a kuminsá mesora ku e investigashon riba djadumingu 18 di yüni. E departamento di Investigashon Forénsiko tabata na e sitio pa kolektá material di prueba i e siguiente dia ku ayudo di Stinapa a saka restu di e boto for di awa pa un investigashon mas profundo. Ainda Kuerpo Polisial Hulanda Karibense ta investigando kousa di e kandela. Nan ta trata e kaso den un forma sumamente serio i nan ta hasi nan investigashon profundamente.
For di Piskabon nan a reakshoná ku preokupashon riba destrukshon di e boto. Esaki tin impakto riba tantu piskamentu komo riba nos komunidat. Durante e konferensia di prensa den oranan di mainta dia 21 di yüni, Piskabon a ekspresá su indignashon.
