Departamento di Pòst i Archivo di Entidat Públiko Boneiru tabata di fiesta. E hefe di departamento Lucia Anthony-Evertsz, a selebrá ku e ta sirbi pueblo di Boneiru pa 45 aña.
Lucia Anthony Evertsz a drenta den servisio den aña 1976. Despues di 10 aña a nombr’é Segundo Sekretario Interino di Eilandgebied Bonaire. El a ehersé e funshon aki pa tres aña largu. Despues el a bira Segundo Sekretario. E siguiente paso tabata pa departamento Pòst i Archivo. Einan el a keda nombrá pa hefe di departamento. Un funshon ku e ta ehersé 23 aña.
Lucia ta hasi su trabou ku hopi pashon i amor pa pueblo boneriano. E ta saka forsa i motivashon for di spiritualidat. Kristu Hesus ta su fuente di inspirashon.
Ku su eksperensia enorme Lucia Anthony Evertsz ke bisa e young professionals di Boneiru pa nan keda motivá, disipliná, kolegial i responsabel. “Sinti bo konektá ka e organisashon ku bo ta traha i tambe na bo trabou”, asin’aki Lucia.
Despues di 45 aña trahando pa gobièrnu Lucia Anthony Evertsz ta bai trabou tur dia ku hopi plaser. E kos di mas plasentero e ta haña ta guia hende. Esaki ta konta tantu pa e siudadano komo su koleganan. E persona ta para sentral den bista di Lucia. Dor di mantené na e reglanan pa archivá, ta yuda e kliente mas mihó.
E departamento Pòst i Archivo ta atendé ku kartanan i pòst ku ta drenta, maneho di archivo i dokumentashon pa Entidat Públiko Boneiru.
