For di e siman akí tur doño di un vehíkulo di motor ta risibí nan anslag pa e impuesto di vehíkulo di motor (MRB) pa aña 2025. E aña akí a manda e anslag mas lat ku ta kustumber. Entidat públiko Boneiru a posponé mandamentu di e anslag debí na vários mehorashon den e prosesonan interno, ku kua ta optimalisá e servisio i prosesamentu mas aleu.
Fecha 1 di mart 2025
E fecha riba e anslag ta 1 di mart 2025. No opstante e término adaptá pa manda e anslag, e fecha akí ta keda vigente. Doñonan di un vehíkulo di motor tin ku mantené nan mes pues na e fechanan di vensementu menshoná riba e anslag pa pago i eventual pasonan di kontinuashon.
Lay-out nobo pa e anslag
Un otro punto importante di atenshon ta e lay-out nobo di e anslag, manera por mira riba e ilustrashon athunto. E anslag ta diseñá den un forma mas komprendibel i tin splikashonnan klarito riba e diferente partinan. Di e manera akí e ta mas fásil pa lesa i ku mas enfoke riba usuario.
Pregunta òf mas informashon
Si bo tin pregunta tokante e anslag òf e lay-out nobo, e ora ei bo por akudí riba https://bonairegov.com/pa/habitante/impuesto-di-vehikulo-di-motor, òf manda un email na belasting-olb@bonairegov.com.
