For di aña 2013 tin atenshon pa monumentonan na e último dia dia di sèptèmber. Esaki a sosodé na vários manera, komo sitionan, charla i publikashonnan. Dia 2 di òktober 2019 e kolegio ehekutivo di Boneiru a disidí pa duna e dia di monumento un estado ofisial ku e último djadumingu di sèptèmber komo fecha. E dia a wòrdu deklará pa enfatisá e interes di monumentonan pa nos komunidat.
Pero kiko ta un monumento?
Tin tres kategoria di monumento:
- Lugánan na unda haña ophetonan históriko
- Biennan monumental móbil
- Biennan monumental inmóbil
Kuminsando ku un promé menshoná: Lugánan na unda haña ophetonan históriko ta lugánan na unda a haña ophetonan ku a laga atras pa sivilisashonnan promé ku e spañónan a yega Boneiru. Esaki ta por ehèmpel pinturanan den kuebanan, fundeshi di kasnan di indjan, pues ta trata di lugánan ku balor históriko i mítiko.
E segundo biennan mobil ta enserá muebelnan manera boto piskadó ku a konstruí na Boneiru mes, hèrmènt, bistínan di ántes etc..
E último kategoria biennan inmóbil ta enserá edifisionan ku tin mas ku sinkuenta aña ku ta e monumentonan mas visibel riba nos isla i nan ta e tópiko prinsipal den e splikashon aki.
Monumentonan inmóbil ta di interes general pa loke ta trata nan bunitesa, balor históriko balor sientífiko, konforme dekreto di definishon Plan di Monumento 2007.
Boneiru tin te ainda un gran kantidat di edifisionan ku ta kumpli ku e definishon aki. E mayoria ta konsistí di kas di bibienda di antaño, ku a konstruí ku rekurso ku tabata disponibel. Sinembargo e monumentonan aki ta hopi importante pa e kara di nos isla. Ademas Boneiru ta konosí un kantidat limitá di kasnan luhoso di famianan di prestigio ku ta situá prinsipalmente den e sentro di Kralendijk. E kasnan aki ta konsistí generalmente di dos piso ku un pakus òf mangasina na pisa abou i pisa ariba pa biba.
Tin tambe edifisionan públiko manera skol, misa, kèrki, ofisina di gobièrnu, mangasina di gobièrnu ku tin balor históriko òf monumental. Kiko ta e balor di e monumentonan aki i pakiko e ta importante pa konservá nan?
E balor prinsipal ta e indikashon ku e edifisionan ta duna den e forma di bida i pensamentu di e personanan ku a konstruí òf diseñá nan. Nan ta siña nos e lucha pa eksistensia diario den e siglo diesnuebe. E edifisionan ta duna nos indikashon di e manera tékniko ku a usa pa konstruí diferente parti di un kas
E flurnan tabata konstruí di palu den e periodo despues di e abolishon di sklabitut. Mas despues semènt a keda introdusí komo material pa konstrukshon na Boneiru. Murayanan tabata konstruí dor di flèktu takinan i hunta ku lodo, yerba i kalki.
Mas òf ménos na aña 1835 piedra di koral a keda introdusí komo material pa konstruí kasnan Despues e introdukshon di betòn komo material di konstrukshon na aña 1914, piedra di koral a wòrdu remplasá ku blòki di betòn òf piedra i semènt.
Den tempu di antaño nan tabata traha dak den forma di un kuadro di tronkon di palu tapá ku pal’i mainshi. Despues a remplasá e pal’i mainshi ku plachi di zim. Pa edifisio mas grandi den e tempu aya ya kaba tabata usa panchi trahá den fòrnu. Hopi biaha nan tabata hunta kalki parti abou di e panchinan akí pa hasi nan mas resistente kontra awa (panchi striká) i nan tabata usa palu di skaf pa e balkinan ku ta karga e dak. Asina por mira un desaroyo bon kla den e sistema di konstruí. Den tempu moderno naturalmente ta usa material ku no tabata disponibel den tempu ku a konstruí monumento.
Finalmente kada edifisio tin su storia, loke ta nifiká ku tin famianan a biba den e edifisionan akí, ku kada un na nan mes manera a duna un aporte na e Boneiru di ántes i di awor. E aspekto históriko akí ta pertenesé tambe na e patrimonio kultural ku e monumentonan ta para p’é. No por mira un lòs for di e otro.
