Un grupo di mas o ménos 15 militar di Defensa ta na Boneiru for di ayera anochi pa aselerá limpiesa di petroli na kosta. Gezaghèber interino Reynolds ‘Nolly’ Oleana a anunsiá nan yegada durante un konferensia di prensa ku a tuma lugá ayera. Djaweps ta hasi uso di e militarnan pa limpiesa na Foodies i Lagun, despues Punto Kalbas i Mar Cultura ta na bùrt.
Gezaghèber interino Oleana ta kontentu ku e yudansa for di Hulanda. "Nos ta kontentu ku e yudansa, asina por kombatí e kontaminashon ainda mas rápido. Boneiru tabatin sufisiente kapasidat kaba pa limpia e petroli. Último dianan hopi grupo a ofresé nan yudansa pa hasi limpiesa. Nos ke gradesí tur e gruponan akí pa nan oferta i disponibilidat,’’ asina gezaghèber a deklará.
Oleana a bisa tambe ku e situashon ta parse bou di kontròl, pero ta muchu tempran ainda pa selebrá. Tin ku mira kiko ta pasa e dianan ku ta bini. A limpia e petroli na Sorobon. Pero ta muchu tempran pa habri Sorobon mesora.
Promé tin ku mira si e situashon manera e ta awor ta kambia. E yamada ketu bai ta na vigor pa no drenta awa, landa, piska, sambuyá òf kayak na e lugánan kaminda petroli a yega tera. Mester ta kla promé ku e partinan chikitu di petroli den awa no ta malu pa salú. Djaweps gezaghèber i su tim ta spera di duna mas klaridat tokante Sorobon.
Durante limpiamentu di petroli, a skohe pa limpia e área di Lac/Sorobon promé. Ta asina ku e área di rekreashon aki ta hopi popular serka hende lokal, piskadó, turista i empresarionan ku tin un negoshi aya. Pa limpiesa na Lagun ta usa ekipo pisá.
Kapitan di haf Günther Flanegin a deklará durante e konferensia di prensa ku petroli a yega awor na Onima i Playa Frans tambe. E área entre Willemstoren i Cargill ta limpi. E kapitan di haf i su ekipo ta sigui mónitòr e situshon. Flanegin a enfatisá meskos ku gezaghèber pa keda alerta i no pensa ku tur kos a pasa.
Organisashon di naturalesa STINAPA ta koordiná limpiesa di e áreanan ku ta shushi. No ta kla ainda pa e organisashon di naturalesa kua ta e efektonan di e derame di petroli pa medio ambiente. Solamente despues ku a limpia e áreanan shushi, STINAPA por hasi investigashon di e posibel daño na naturalesa. Asina Judith Raming, mènedjer di e organisashon a deklará.
