Dia Mundial di Hipertenshon ta un oportunidat pa tur hende pa bira konsiente di e malesa importante akí i pa mantené un preshon di sanger salú. Pa medio di pone pasonan chikitu pa tene preshon di sanger bou di kontròl, por redusí hopi riesgo i problema ku salú. Esaki ta kontribuí na un mihó salú. Pa detektá un preshon di sanger ku ta muchu haltu, riba Dia Mundial di Hipertenshon ta invitá tur hende riba 40 aña pa laga midi nan preshon di sanger i haña informashon tokante e importansia di un preshon di sanger salú. Di e manera akí dia 17 di mei 2023 entre 08:00 or i 14:00 or tur hende por pasa sin sita na e konsultanan di dòkter di kas na: Rincon Medical Centrum, Bonaire Medisch Centrum, Sentro Mediko Sùit i Klínika Antriol (Dr. Lont). Por bishitá Fundashon Mariadal (e hòspital) tambe entre 08:30 or i 11:30 or pa laga midi bo preshon di sanger. Komo parti di un konkurso lo entregá makutu di fruta i pakete di bèrdura na 5 bishitante.
Un preshon di sanger haltu ta nifiká ku tin muchu hopi preshon riba bo adernan i bo kurason. Ora bo tin preshon di sanger haltu pa un tempu largu, esaki por kondusí na daño na bo adernan. Pa motibu di esaki bo por haña problema serio ku bo salú, manera un ataka serebral, un ataka di kurason òf problema ku nir. Hopi hende no sa ku nan tin preshon di sanger haltu, pasobra mayoria biaha un preshon di sanger muchu haltu no ta duna ningun keho. Un preshon di sanger salú ta keda generalmente bou di 130/80. Si bo preshon di sanger ta mas haltu, kisas bo tin ku tuma sierto pasonan pa mantené bo preshon di sanger bou di kontròl.
Ta importante pa trata un preshon di sanger ku ta muchu haltu. Esaki bo mes por hasi pa medio di por ehèmpel move mas, kome ménos salu i stòp ku humamentu. Tin ora un tratamentu ku remedi ta nesesario. Na Boneiru tin bon posibilidat di tratamentu pa trata preshon di sanger haltu. Na bo konsulta di dòkter di kas bo ta haña por ehèmpel bon guia di parti di un sostenedó di práktika spesialisá. Ora ku bo preshon di sanger ta seriamente haltu, nan ta referí bo na un spesialista na hòspital. Pa mas informashon tokante preshon di sanger haltu, wak riba https://www.hartstichting.nl/oorzaken/bloeddruk/hoge-bloeddruk
