Entidat Públiko Boneiru ta bai renobá mas kaya. Na e lista di kamindanan ku ta bai haña asfalt i pone asera nobo, a añadí diestres kaya mas. E trabounan aki ta forma parti di e asina yama ‘wegenprogramma’.
Anteriormente ya kaba a anunsiá den un konferensia di prensa ku ta bai kuminsá ku 3 kaminda: Kaya Commerce na Rincon, Kaya Gramel i Kaya Neerlandia. Awor akí e sobrá kamindanan ku nan ta bai renobá ku finansiamentu di Ministerio di Infrastruktura i Maneho di Awa tambe ta konosí.
Den e tabèl akí bou por mira e kamindanan ku nan ta bai renobá kompletamente denter di e programa. Den 2022 ta bai kuminsá mas tantu posibel ku e kamindanan ku ta planiá pa 2022 – 2023. E planifikashon berdadero ta dependé tambe di e temporada di awaseru. Na aña 2022 lo entregá un petishon pa finansiamentu di un siguiente sèt di kaminda ku mester keda renobá.
Banda di e programa di kaminda akí ta duna atenshon tambe na un mantenshon akselerá i mehorá di e kamindanan. Pa esaki ta formulá un programa di mantenshon, ku ta keda finansiá for di medionan lokal. Denter di poko ta sigui mas informashon tokante esaki.
E trabounan na Kaya Commerce na Rincon ta den pleno marcha i nan ta kana segun skema. Despues di a konstruí e rant di asera, riba djarason 17 di yüni nan a kuminsá ku e fundeshi. Despues di esei e kontratista ta pone klenku pa e asera i despues e lo kita e asfalt for di riba e kaya i basha esaki di nobo.
