Ku gran satisfakshon i gratitut e Komishon di Dia di Boneiru ta wak bèk riba un tremendo selebrashon di Dia di Boneiru 2025. Tabata un dia yen di kultura, konektividat i orguyo, kaminda nos tema ‘Nos ta Boneiru’ realmente a haña bida.
E selebrashon a kuminsá ku e seremonia kaminda nos a hisa bandera i nos orguyo nashonal orguyosamente tabata pará sentral. Durante e seremonia akí a hasi e kondekorashon ofisial di nos siudadanonan di honor Delno Lionel Alfeo Tromp i Nicetas “Gacha” Engracia Piard. Ku e rekonosementu aki, nos ta enfatisá e importansia di kontribuí i duna algu bèk na nos komunidat.
Pa medio di esaki e Komishon di Dia di Boneiru ta gradisí tur hende: for di nos partnernan, bishitantenan i naturalmente e públiko grandi ku tabata presente ku asina tantu entusiasmo. Danki na boso kompromiso i boso energia positivo Dia di Boneiru a bira un fiesta ku ta yena nos tur ku orguyo.
Gobiernu di Boneiru ta invitá nos komunidat pa mantené e spiritu di ‘Nos ta Boneiru’ na bida durante henter aña i pa kuminsá prepará nos mes di antemano pa Dia di Boneiru 2026.
Bishitá nos página di Facebook: Gobièrnu di Boneiru pa wak e portrètnan di Dia di Boneiru.
Nos ta Boneiru!
