Dekreto di Gezaghèber di Boneiru (23 aprel 2021) Lesa mas tokante di e pandemia COVID-19

 

Mas kupo di trabou na Selibon den proyekto pa resiklahe di shushi

Selibon i Plenchi di Trabou a kuminsá ku un kolaborashon pa yena kuponan di trabou den un proyekto piloto di prosesá shushi di kas.

Kralendijk – Selibon i Plenchi di Trabou a kuminsá ku un kolaborashon pa yena kuponan di trabou den un proyekto piloto di prosesá shushi di kas. Plenchi di Trabou ta finansiá sinku kupo di trabou na Selibon pa personanan ku un limitashon físiko. Ta ehersé e tareanan di e proyekto aki tantu riba pia komo sintá. E proyekto ta konsistí di diferente tarea di resiklahe di shushi i preparashon pa por eksportá òf reusá esakinan.

 

“Na e momentonan aki tur shushi ku Selibon rekohé ta keda separá i transportá pa Lagun. Na Lagun e shushi lo keda almasená na kategoria. Selibon kier bai dal un stap mas leu. Den futuro lo prepará un parti di e shushinan manera karton, plèstik, glas, aluminio/metal i aparatonan elektróniko pa reusá na Boneiru òf pa eksportá pafó di Boneiru. E sinku personanan ku a kuminsá traha na Selibon lo bai yuda alkansá e meta aki” segun sr. Rudsel Leito – direktor di Selibon NV.

Den e último añanan Selibon NV a bira un kompania ku no ta enfoká solamente riba rekohementu di shushi. E ta un kompania ku ta sòru pa e shushi por keda almasená i prosesá na un manera responsabel i sigur. Komo un empresario ku vishon sosial, Selibon tin e ambishon pa laga su kompania ta un refleho di e diferente personanan den nos komunidat.