Maneho nobo di Peska na Boneiru Nieuw Visserijbeleid Bonaire

Riba tereno di agrikultura i peska LVV tabata visiblemente hopi aktivo último tempu.

E Servisio di Agrikultura, Krio di Bestia i Peska (LVV) ke stimulá un peska sostenibel, efisiente i efikas na Boneiru. Pa logra esaki entre otro a duna koperashon na e Plan di Maneho di Peska Hulanda Karibense 2020 – 2030. Riba tereno di agrikultura i peska LVV tabata visiblemente hopi aktivo último tempu. Sinembargo durante e aña tras di lomba pa loke ta trata peska tambe hopi kos a tuma lugá. Awor akí visiblemente LVV ke fortifiká i kontinuá ku e desaroyonan akí mas aleu.

LVV ta haña di importansia ku Boneiru ta disponé di un maneho di peska sólido, aktual i ku sosten amplio i un plan di akshon ku na korespondé na esaki. Pa e motibu akí LVV, huntu ku ministerio di Agrikultura, Naturalesa i Kalidat di Alimento (Landbouw, Natuur en Voedselkwaliteit - LNV), a pidi e kònsùltentnan Agrinature BV i Beyonder BV pa duna LVV sosten den formulashon di esaki. Pieter van Baren i Weero Koster respektivamente ta dirigí e organisashonnan akí. Konhuntamente nan tin hopi eksperensia riba tereno di peska i sostenibilidat.

No opstante su eskala chikitu i karakter artesanal e sektor di peska na Boneiru ta importante komo fuente di entrada. Na mes momentu e sektor ta un konfirmashon di e identidat boneriano. E ta krea empleo, e ta sòru pa sustitushon di importashon (i di e manera ei pa preservashon di divisa), e ta proveé habitantenan di alimento saludabel i e tin un funshon sosial i kultural importante.

Gustosamente Entidat Públiko Boneiru, pa medio di LVV, ke realisá un maneho di peska sostenibel. Desaroyo di esaki ta un esfuerso konhunto di tur interesado, entre otro piskadónan, gobièrnu, organisashonnan no-gubernamental ku ta dediká nan mes na konservashon di naturalesa, i kumpradónan. P’esei e servisio di Agrikultura, Krio di Bestia i Peska (LVV) di e manera akí ta informá públiko en general i interesadonan pa duna nan e posibilidat pa aportá ku nan ideanan relashoná ku e maneho di peska i e plan di akshon korespondiente.