Dia 28 di ougùstùs un seshon balioso i interaktivo a tuma lugá ku kunukeronan i piskadónan di Boneiru. Durante e enkuentro akí nan a papia tokante e efektonan di kambio di klima riba agrikultura, krio di bestia i piskamentu, i e nesesidatnan di mas importante i e posibel puntonan di akshon for di e sektor mes a bini dilanti.
E grupo di proyekto Mesa di Klima Boneiru a organisá e seshon. Mesa di Klima Boneiru ta un inisiativa di Entidat Públiko Boneiru (2024-2026) i nan ta traha riba desaroyo di un plan di klima pa nos isla. Bou di guia di Nolly Oleana e grupo di proyekto ta bai den kòmbersashon ku diferente grupo, entre otro organisashonnan, empresanan, hóbennan i habitantenan di bario. Tur e vishonnan ku nan akumulá ta forma huntu e base pa e plan di klima final.
Kunukeronan i piskadónan ta forma un grupo indispensabel den nos komunidat: nan ta proveé Boneiru ku kuminda lokal manera bèrdura, fruta, karni i piská. Netamente e sektornan akí kada biaha na un manera mas fuerte ta eksperensiá e konsekuensianan di kambio di klima, manera kalor, sekura, áwaseru ku ta varia hopi i sierto tiponan di piská ku ta move bai áreanan mas friu. Pa e motibu akí fortifikashon di outosufisiensia di nos isla ta rekerí preparashon na tempu i sosten di sektor primario.
Durante e enkuentro na Jong Bonaire, 15 kunukero i piskadó a partisipá aktivamente na e diskushon den un esfera habrí i konstruktivo. Nan a kompartí nan eksperensianan i nan a presentá puntonan problemátiko i solushonnan, manera:
• mas atenshon i apresio pa sektor di agrikultura i sektor di piskamentu;
• mihó akseso na supsidio i sosten;
• kolaborashon i interkambio di konosementu entre kunukeronan i piskadónan;
• solushon pagabel i duradero pa uso di awa.
Ku satisfakshon e grupo di proyekto ta wak bèk riba e seshon i ta ekspresá su apresio pa e kontribushonnan balioso di e partisipantenan. E grupo di proyekto ta inkluí e input akí den e elaborashon mas aleu di e Plan di Klima Boneiru, ku nan lo entregá den e promé kuartal di aña 2026. E plan akí mester sòru pa un strategia konhunto riba término largu, ku kua Boneiru por adaptá su mes na e konsekuensianan di kambio di klima.
