Kriamentu di kabritu na Boneiru ta birando mas profeshonal. P’esei resien a dediká hinter un wikènt ku charla pa logra oumentá e konosementu riba tereno di kriamentu di kabritu. Hopi kunukero tabata presente pa informá nan mes.
Bou di guia di e oradornan Ing. Edward Berben (anterior hefe di LVV) i Ing. Sherwin Pourier (lider di proyekto di Krio di Bestia Profeshonal) a trata vários tema. Tópikonan importante ku a bini dilanti tabata mehorashon di rasa, nutrishon, unda pa pone e bestianan i marka di kalidat.
Tabatin un parti práktiko tambe kaminda a mustra i papia tokante karakterístikanan pa selekshon di bon kabritu muhé pa produsí lamchi. Selektando e mihó kabritunan muhé, pa medio di kastamentu ku chubatunan di rasa lo produsí bunita lamchi. E lamchinan akí tin karni moli i por bende nan pa un mihó preis.
Pa medio di refreská i oumentá konosementu di nos kunukeronan, servisio di Agrikultura, Krio di Bestia i Peska (LVV) ta spera di reaktivá krio di kabritu na un manera profeshonal na Boneiru. Debí na un asistensia grandi di kunukeronan, dentro di poko e servisio di Agrikultura, Krio di Bestia i Peska (LVV) lo organisá mas tayer.
