E krusero Rotterdam di Holland America Line durante fin di siman a bishitá Boneiru pa promé bes. Rotterdam a yega Boneiru den oranan trempan di mainta ku un total di 1513 pasahero i 1000 tripulante.
Byron Tromp, di agensia Armada Port Agency, a yama kapitan di e barku Bas van Dreumel i su tripulashon bon biní na Boneiru. Esaki a tuma lugá den presensia di gezaghèber interino Reynold Oleana, diputado di turismo Hennyson Thielman, kapitan di haf Günther Flanegin, lots Daymiro Janga i Rolando Marin di Tourism Corporation Bonaire - TCB.
Gezaghèber interino Reynold Oleana durante su diskurso a informá kapitan van Dreumel tokante Boneiru su kultura i naturalesa i diputado Thielman a trese dilanti kon importante turismo krusero ta pa nos isla i ku e ta sumamente agradesido ku Rotterdam lo ta na Boneiru 17 di desèmber 2021 atrobe.
Gezaghèber interino Oleana i diputado Thielman na nòmber di Entidat Públiko Boneiru a hasi entrega di bandera di Boneiru i a duna un splikashon amplio di nos bandera na kapitan van Dreumel. Kapitan di haf Günther Flanegin a entregá e kapitan un kuadro di e momentu ku Rotterdam tabata drentando haf di Boneiru.
Rolando Marin i Joanny Trinidat di ofisina di turismo a entregé e buki ‘Bonaire Point to Point’ yen di bunita ilustrashon di e naturalesa bou di awa i riba tera di Boneiru.
Finalmente Byron Tromp di agensia Armada Port Agency a entregá e kapitan e buki ‘Monument Bonaire’ ku ta bai tokante kasnan di ántes di nos isla.
Kapitan Bas Van Dreumel a keda enkantá i agradesido ku e bishita ku el a risibí di nos mandatarionan i otro profeshonalnan i komo muestra di apresio a entregá nan un rekuerdo den forma di un modelo den ‘Delfts blauw’ di e krusero Rotterdam.
