E krusero Enchanted Princess durante fin di siman bispu di Pasku a bishita Boneiru pa promé bes. Enchanted Princess a yega Boneiru den oranan trempan di mainta ku un total di 1900 pasahero i 1350 tripulante.
Byron Tromp, di agensia Armada Port Agency, a yama kapitan di e barku Mario Ciruzzi i su tripulashon bon biní na Boneiru. Esaki a tuma lugá den presensia di gezaghèber Edison Rjjna, kapitan di haf Günther Flanegin, Marjolein Oleana i Helen Thode Mercera di Tourism Corporation Bonaire - TCB.
Gezaghèber Edison Rijna na nòmber di Entidat Públiko Boneiru a hasi entrega di bandera di Boneiru i a duna un splikashon amplio di nos bandera na kapitan Mario Ciruzzi.
Kapitan di haf Günther Flanegin a entregá e kapitan un kuadro momentu ku krusero Enchanted Princess tabata aserkando haf di Boneiru.
Marjolein Oleana i Helen Thode Mercera di TCB a entrega kapitan buki “Bonaire Point to Point” yen di bunita ilustrashon di e naturalesa bou di awa i riba tera di Boneiru.
Byron Tromp di e agensia Armada Port Agency a entrega kapitan e buki
“Monument Bonaire” ku ta un buki tokante kasnan di ántes di nos isla.
Kapitan Ciruzzi a keda agradesido na tur i komo muestra di apresio a entregá nan un rekuerdo di e barku. Den oranan di anochi e barku a sali ku destino Dominica, Sint Thomas i Gran Turk.
