“Un stap grandi pa dilanti”, segun diputado James Kroon tokante e anunsio di gobièrnu pa reservá trinta mion pa e próksimo aña pa asina por drecha e forsa di kompra i kombatí pobresa na Karibe Hulandes. For di 2025 e montante aki lo oumentá anualmente ku trintidos mion.
“Naturalmente mi ta kontentu , pero no lubidá ku preisnan tambe a subi bastante den e último aña. Pa e motibu ei mi ta mira e trinta mion ei komo un paso intermedio. Ta hopi sèn, pero e no ta sufisiente pa kaba ku pobresa. Sekretario di estado Van Huffelen tambe ta rekonosé esei. Nos ta warda ku ansha riba e rapòrt di komishon Thodé ku lo mester keda presentá komienso di òktober. E ora ei lo keda demostrá kon grandi e diskrepansia entre e salario mínimo, e kompensashonnan i tambe loke e hendenan mester di bèrdat pa por biba di dje”, segun diputado.
“Mi ta urgi gabinete pa tuma e konsehonan di e komishon hopi na serio i pa tuma un desishon lihé pa ku e introdukshon di un mínimo sosial. Mi no ta pidi solamente pa oumentá suèldu, pero ministerionan mester ta segun mi mas aktivo den baha e gastunan di kosto di bida. Komo kolegio ehekutivo nos ta kla pa huntu ku ‘Den Haag’ nos intensivá e lucha kontra pobresa.”
E trinta mion euro ku gabinete ke invertí èkstra den 2024 na e islanan BES lo por keda uzá pa oumento di e kompensashon, e suma adishonal pa yu, transporte públiko pagabel i banko di kuminda. Mas aleu lo bai chèk e posibilidat huntu ku dunadónan di trabou i sindikato pa un oumento adishonal di e suèldu mínimo manera e ta preskribí den lei. “Tur hende, spesialmente e hendenan ku e suèldunan mas abou, lo bai nota algu di e kontribushon èkstra. Esei mi ta kontentu kuné”, segun diputado Kroon.
