Mayornan i kuidadónan ta hunga un ròl grandi den bida di un mucha. Temanan manera kuminda, moveshon, drumimentu, kantidat di ora dilanti di skrin i higiena di boka ta influensiá fuertemente kon nos muchanan ta lanta na Boneiru. Pa e motibu akí loke mayornan i kuidadónan ta eksperensiá ta asina importante. P’esei na luna di sèptèmber GGD Boneiru ta kuminsá ku e ‘Kindmonitor 2025 – Monitor di Mucha 2025’: un lista di pregunta online seif i anónimo ku ta mustra kiko nos muchanan na Boneiru realmente tin mester pa lanta na un manera salú i felis.
Tur mayor òf kuidadó di un mucha di 0 te ku 12 aña ta haña invitashon pa partisipá. Pa medio di yena e lista di pregunta, bo ta duna input balioso pa un mihó maneho, mas sosten adekuá i mehorashon práktiko na nos skolnan i den nos barionan. Pensa riba inisiativanan manera punto di bebe awa, kuminda saludabel na skol i aktividat di deporte òf edukashon den bario. Tur esaki danki na e señalnan di mayornan i kuidadónan.
E lista di pregunta online ta disponibel na papiamentu, hulandes, ingles i spañó. Ta dura 10 pa 15 minüt pa kontestá e preguntanan i e ta kompletamente anónimo. Solamente si bo ke partisipá na e rifa pa un bòn di regalo di $20, nos ta pidi bo informashonnan di kontakto. Nos ta warda esakinan apart for di bo kontestanan i nos ta usa nan únikamente pa e rifa. Bo privasidat ta kompletamente garantisá.
E lista di pregunta ta aksesibel for di 1 di sèptèmber via https://shorturl.at/omsTo i via QR-code riba poster i foyeto, i serka e personanan ku ta hasi enkuesta na sitionan manera skol, evento i sentro di bario. Banda di esaki riba djaweps 11 i 25 di sèptèmber 2025 di 14:00 or pa 18:00 or mayornan ku ke yudansa pa yena e lista di pregunta òf ku tin pregunta tokante e investigashon, por kana drenta sin sita na GGD.
Laga skucha bo bos. Yena e Kindmonitor – Monitor di Mucha, i kontribuí na un Boneiru kaminda tur mucha por lanta na un manera salú i felis.
E Kindmonitor – Monitor di Mucha ta un kolaborashon entre GGD Boneiru, Mulier Instituut i JOGG i e ta risibí sosten di Sentro Akseso.
