Departamento di Salubridat Públiko ta konsehá biaheronan tambe pa informá bon tokante kondishonnan di biahe di e pais ku nan ta bai. Ta sosodé último tempu ku ta ora ku nan ta check in ku biaheronan ta deskubrí ku nan no por biaha pa motibu ku nan no ta bakuná. Òf pa motibu ku nan no a pasa e angua na tempu. Djasabra 26 di novèmber ta e último dia ku siudadanonan por pasa e angua kontra corona sin sita di 09:00or-16:00or na SGB na Playa, Kaya Frater Odulfinus.
Tin biaha departamento di Salubridat Públiko ta haña e pregunta si biaheronan no bakuná por pasa e angua kontra corona riba e dia di salida mes. Esei ta posibel, pero den un kaso asina e biahero tòg no por biaha. Esaki pasobra e persona no ta kumpli ku e regla ku el a pasa e angua minimalmente 7 dia òf tin biaha 14 dia promé ku salida. Kada pais ta pone su propio kondishonnan.
Ta sosodé tambe ku biaheronan no bakuná riba e dia ku nan ta biaha ta pidi departamento di Salubridat Públiko un prueba di bakunashon. Nan ta pidi esaki asina nan por biaha tòg. Siudadanonan ta haña un prueba di bakunashon i un kódigo QR di Salubridat Públiko solamente si nan a pasa e angua.
Pa mas informashon yama e number grátis 0800 0800.
