Kompensashon pa un solo biaha pa kompania di taksi, “tour” i di hür outo

Kolegio Ehekutivo di Boneiru ta anunsiá un medida di sosten adishonal pa kompanianan di transporte turístiko.

Kolegio Ehekutivo di Boneiru ta anunsiá un medida di sosten adishonal pa kompanianan di transporte turístiko. E sosten ta enserá un kompensashon pa gastunan di impuesto di vehíkulo di motor (motorrijtuigenbelasting) di un solo biaha na tur taksi, kompania di “tour” i di hür outo registrá na Kámara di Komèrsio, den kuadro di e pandemia di Covid-19. Ta trata di un montante di $ 100,- di kompensashon pa kada vehíkulo ku e taksista, kompania di “tour” òf hürdó di outo tin registrá bou di su negoshi.

Kompará ku otro negoshi den e sektor di turismo, taksistanan, kompanianan di “tour” i hürdónan di outo a mira un bahada di entrada signifikante durante e krísis di Covid-19. Netamente pa e motibu aki gobièrnu di Boneiru ta introdusí un  kompensashon di sosten pa por aliviá nan gastunan di impuesto

Por otorgá e kompensashon di un solo biaha akí na esnan ku:

  1. ta inskribí i ta bibá na Boneiru;
  2. por demostrá ku e fecha di establesimentu di su negoshi na Boneiru ta promé ku 1 di mart 2020;
  3. a paga impuesto di outo di aña 2020 kompletu;
  4. bo negoshi ta registrá na Kámara di Komèrsio Boneiru;
  5. si ta trata di un negoshi di taksi: bo ta e shofùr prinsipal i alabes bo ta esun ku ta registrá komo responsabel pa e pèrmit i tin e último dekretonan bálido ku ta demostrá esaki;
  6. si ta trata di un negoshi di hürmentu di outo: bo mester tin komprobante di pago di impuesto di hürmentu di outo di e tres último lunanan;
  7. ta pidi e kompensashon pa un vehíkulo ku ta registrá, òf mas bien vehíkulonan di e negoshi ku ta registrá i ku ta aparesé den e sistema di registrashon di Entidat Públiko Boneiru.

Por apliká pa e medida di sosten aki te ku dia 10 di òktober 2021. Download e formulario di petishon na https://bonairegov.com/pa/empresarionan/kompensashon-pa-un-solo-biaha-pa-kompania-di-taksi-di-tour-i-di-huer-outo. Yen’é, skèn e i mand’é huntu ku e pruebanan pidí i aneksonan via di e-mail na alivio@bonairegov.com. Tambe por entreg’é personalmente na ofisina di Direktorado di Komunidat i Kuido na Kaya Neerlandia 41, for di djaluna te ku djabièrnè entre 8’or i 11’or di mainta.

E kompensashon ta pa kada un vehíkulo ku ta registrá. Taksista i hürdó di outo ku por bini na remarke pa e kompensashon aki lo risibí tambe un karta. Si bo ta kere ku bo negoshi ta bini na remarke, pero bo no a risibí e karta, tuma kontakto libremente via e-meil: alivio@bonairegov.com.