Kome i papia normalmente no ta bai huntu, pero durante e Dianan Nashonal Di Lesa Pa Mucha Tende sí ta pèrmití esei. Djárason diputado Nina den Heyer a desayuná ku e chikitinnan di Sentro pre-Eskolar Hardin Tia Sus i e diputado a lesa pa nan tende for di e bunita buki di prenchi ‘E maleta’ di Chris Naylor-Ballesteros. E aña akí e Dianan Nashonal Di Lesa Pa Mucha Tende ta for di 26 di yanüari te ku 5 di febrüari.
Durante e Dianan Nashonal Di Lesa Pa Mucha Tende Biblioteka Públiko Boneiru ta organisá un èstafèt di hende ku ta lesa pa mucha tende ku ta pasa diferente lokalidat di akohida pa mucha. Kada dia for di bibiloteka un hende ku ta lesa pa mucha tende ta bai lesa for di un di e bukinan di e Tòp 10 di Buki di Prenchi.
Den e periodo tras di lomba tin ora nos skolnan i akohidanan pa mucha tabata será. Pa e motibu akí ta èkstra importante pa stimulá mayornan i kuidadónan pa lesa mas tantu biaha pa mucha tende. Lesa pa mucha tende ta fortifiká e laso entre mayornan i nan yunan i ademas: lesa pa mucha tende ta hasi bo mas grasioso! Lesa pa mucha tende ta bon pa desaroyo di idioma di mucha i ta yuda e chikitinnan komprendé idioma mas mihó i e ta engrandesé nan vokabulario.
Riba djabièrnè 4 di febrüari ta klousurá e Dianan Nashonal Di Lesa Pa Mucha Tenda ku atrobe un desayuno di lesa pa mucha tende. E dia ei e chikitinnan ta bai Biblioteka Públiko Boneiru pa un desayuno i naturalmente un bunita kuenta pa nan tende.
