Direktorado Supervishon i Mantenshon di Lei a anunsiá na nòmber di Kolegio Ehekutivo di Boneiru di tuma medida administrativa kontra Servisio di Limpiesa Boneiru (SELIBON) si nan no repara nan obligashon na Landfil Lagun prome di 1 di aprel ku ta bin.
SELIBON tin e responsabilidad pa paga e kandela (bou di tera) i tuma tur e medidanan nesesario pa prevení ku nan no bolbe lanta of ku otro kandela surgi. Ademas, SELIBON mester tapa e parti di Landfil Lagun ku no ta den uzo mas, pa prevení kontaminashon di medio ambiente i nos suela. Si nan no kumpli ku esaki den e término indiká, Kolegio Ehekutivo lo tuma e trabou na su man via medida administrativa i riba gastu di SELIBON.
Kandela na Landfil Lagun
Pa basta tempu tin kandela (bou di tera) na Landfil Lagun. SELIBON tin un obligashon legal pa hasi tur loke ta posibel pa prevení molèster i daño na otro hende ku nan aktividat. Direktorado Supervishon i Mantenshon di Lei a manda un karta na SELIBON indikando ku si den kuater siman nan no kumpli ku e obligashon aki, lo tuma medida administrativa kontra nan.
Obligashon di Kuido
Varios inspektashon di Direktorado Supervishon i Mantenshon di Lei a mustra ku SELIBON no ta kumpli ku su obligashon di kuido. Nan no tin un plan pa kombatí i prevení kandela, ni un plan operashonal ku ta garantisá maneho sostenibel di desecho i protekshon di salubridat públiko, naturalesa i medioambiente.
Medida Administrativa
Si tin un violashon di lei, e Kolegio Ehekutivo tin e outoridat pa tuma medidanan administrativo pa obligá e infraktor pa tuma akshon korektivo. Kolegio Ekehutivo por imponé un multa of tuma un medida administrativa direkto kontra e infraktor.
Den tur dos kaso, e Kolegio Ehekutivo mester manda un notifikashon por eskrito na e infraktor ku un término pa por kumpli. Si e infraktor no kumpli den e término indiká, KOlegio Ehekutivo por tuma e medidanan nesesario i e gastunan lo ta pa kuenta di e infraktor.
Anulashon di Indeplaatsstelling
Riba 15 di novèmber, Representante di Reino a imponé un ‘Indeplaatsstelling’ riba e Kolegio Ehekutivo tokante ‘Permiso, Supervishon i Mantenshon di Lei na Landfil Lagun’, ku a resulta den traspaso di e podernan pa tuma e medidanan nesesario na e Representante di Reino. Sinembargo, durante e periodo di ‘Indeplaatsstelling’, ningun medida no a wordu tuma pa repara e defisiensianan ku tabata eksistí, loke a kousa un retraso signifikante.
Ku e desishon resien di hues pa anulá e ‘Indeplaatsstelling’, e outoridat a regresa na Kolegio Ehekutivo. Asina, ta kontinua ku e proseso di mantenshon di lei sin obstrukshon i tuma e pasonan nesesario pa solushoná e problema na Landfil Lagun di un manera desidido.
